Eýropanyń qaı elderinde bilim deńgeıi eń joǵary
ASTANA. KAZINFORM — Eýrostattyń sońǵy derekteri boıynsha eýropalyqtardyń bilim deńgeıi burynǵydan da joǵary: barlyq elde áıelder erlerden ozyp otyr, dep habarlaıdy Euronews.
2014 jyly EO-ǵa múshe elderdiń 25–74 jas aralyǵyndaǵy turǵyndarynyń 26%-y ǵana joǵary bilim alǵan bolsa, 2024 jyly bul kórsetkish 33,5%-ǵa deıin ósti.
Joǵary bilim alǵan jastar (25–34 jas) úlesi boıynsha kósh bastap turǵan elder:
- Irlandııa
- Lıýksembýrg
- Kıpr
Bul elderde jastardyń 60%-dan astamy joǵary bilimge ıe.
Al Rýmynııa kerisinshe — sońǵy orynda: bul elde 25–34 jas aralyǵyndaǵy jastardyń 30%-dan azy joǵary bilim alady, bul EO boıynsha eń tómen kórsetkish.
Urpaqtar arasyndaǵy alshaqtyq
Derekter ártúrli urpaqtardyń bilimge degen qatynasynda ózgeris baryn kórsetedi:
- 25–54 jas aralyǵyndaǵy eresekterdiń 82,7%-y keminde orta bilim alǵan;
- Al 55–74 jas aralyǵyndaǵy úlken býyn ókilderinde bul kórsetkish 70,4%.
Jastardyń joǵary bilim alý yqtımaldyǵy úlken býynǵa qaraǵanda eki ese joǵary:
- Jastardyń — 39,8%,
- Úlkenderdiń — 23,9%.
Kásibı bilim alý deńgeıi de el men jas erekshelikterine baılanysty qatty ózgeredi:
- Lıýksembýrgte — orta bilim alǵandardyń 96%-dan astamy kásibı baǵytty tańdaǵan (jas pen úlkender arasynda).
- Portýgalııada — úlkenderdiń tek 13,5%-y kásibı bilim alsa, jastarda bul kórsetkish 37,2%-ǵa teń.
Osyndaı kásibı bilimge betburys Grekııa, Irlandııa, Ispanııa jáne Kıprde de baıqalady. Bul Eýropada naqty daǵdylarǵa baǵyttalǵan bilimge kóshý úrdisin kórsetedi.
Áıelder bilim alýda erlerden ozyp barady
Búkil Eýropa boıynsha áıelder erlerge qaraǵanda kóbirek jáne uzaq bilim alady.
- 2024 jyly 25–34 jastaǵy áıelderdiń 49,9%-y joǵary bilim alǵan;
- Erler arasynda bul kórsetkish — 38,7%.
- 10 jyl ishinde bul alshaqtyq 1%-ǵa arta túsken.
Orta bilim boıynsha da aıyrmashylyq bar:
- 20-24 jas aralyǵyndaǵy áıelderdiń 86,8%-y,
- Erlerdiń 81,8%-y orta bilim alǵan.
Tek Rýmynııada erler áıelderden sál alda tur.
Osyǵan deıin Frantsýz sarapshysy Eýropa aldynda turǵan basty qaýipti atady.