Eýropanyń qaq tórinde «Dombyra ambassadorlary» óner kórsetti
ASTANA. KAZINFORM — Belgııadaǵy Qazaqstan Respýblıkasynyń Elshiliginde elshilik qyzmetkerlerin, qazaq dıasporasynyń ókilderin, stýdentter men Qazaqstannyń belgııalyq dostaryn biriktirgen «DOMBRAssadors» ansambliniń mýzykalyq kontserti ótti, dep habarlaıdy Kazinform agenttiginiń menshikti tilshisi.
Ansambl oryndaýynda «Erke sylqym», «Álqısa», «Atatolǵaýy», «Balbyraýyn» jáne «Sulý qyz» kúıleri kúmbirledi.
Kontserttiń basty ereksheligi — qazaqtyń ulttyq aspaptary dombyra, jetigen, sazsyrnaı, shańqobyz, qobyz jáne daýylpazdyń úni eýropalyq goboı, skrıpka jáne akkordeon aspaptarymen úılesimdi úndesýi boldy.
Bul mýzykalyq kesh ónerdiń túrli mádenıetter men urpaqtardy toǵystyratyn ámbebap kúsh ekenin taǵy bir márte kórsetti.
Qazaqstannyń Belgııadaǵy Elshisi Roman Vasılenko:
— Dombyra — halqymyzdyń jany, tarıhy men urpaqtar jadynyń kórinisi. Ulttyq dombyra kúni qarsańynda onyń kúmbiri Eýropanyń qaq tórinde shyrqalyp jatqany erekshe sımvoldyq mánge ıe. Mýzykanyń shekarasy joq. Dombyra arqyly biz qazaq halqynyń mádenıetin tanystyryp, elderimiz arasyndaǵy dostyqty nyǵaıtamyz, — dedi.
2026 jyly Belgııada eki qazaq mádenı ortalyǵy ashyldy. Onda balalar men qazaq dıasporasynyń ókilderi qazaq tilin meńgerip, dombyra tartýdy úırenedi, ulttyq bıler men qazaq halqynyń salt-dástúrlerimen tanysady. Bul ortalyqtardyń qyzmeti ulttyq bolmysty saqtaýǵa jáne Qazaqstannyń baı mádenı murasyn Belgııada keńinen nasıhattaýǵa yqpal etedi.
Aıta keteıik, Ulttyq dombyra kúnine oraı Qazaqstanda 2000-nan astam mádenı is-shara ótedi.
