Eýropanyń birqatar eli Izraılge qarsy jańa sanktsııalar ázirlep jatyr
ASTANA. KAZINFORM – Eýroodaq deńgeıinde ortaq ustanym qalyptaspaı otyrǵandyqtan, Frantsııamen qatar birqatar eýropalyq memleket jaqyn kúnderi Izraılge qarsy jańa sanktsııalar jarııalamaq. dep habarlaıdy Reuters agenttigi.
Bul sharalar Izraıl qonystanýshylarynyń Iordan ózeniniń Batys jaǵalaýyndaǵy áreketterine baılanysty engizilmek.
Reuters agenttiginiń málimetinshe, Izraılge qatysty qatań sharalardy qabyldaý áreketteri Eýroodaq ishinde buǵattalǵandyqtan, birqatar memleket úılestirilgen ulttyq sanktsııalardy qazirgi jaǵdaıda eń tıimdi sheshim dep sanap otyr.
– Tıisti málimdeme aldaǵy birneshe kúnde jasalady, – delingen materıalda.
Agenttiktiń habarlaýynsha, Batys jaǵalaýdaǵy zorlyq-zombylyqqa qatysy bar tulǵalarǵa qarsy sanktsııa engizý bastamasyn Frantsııa barynsha qoldap otyr.
Parıj bul másele boıynsha Ulybrıtanııa jáne Norvegııamen óz áreketterin úılestirip jatyr.
Frantsııa sheneýnikteri Reuters agenttigine bergen túsiniktemesinde mundaı qadam AQSh pen Iran arasyndaǵy shıelenis, sondaı-aq Izraıldiń Lıvandaǵy áskerı naýqany aıasynda Palestına máselesin halyqaralyq kún tártibinde saqtap qalýǵa baǵyttalǵanyn aıtty.
Mamyr aıynyń sońynda Eýroodaq Izraıldiń qonystandyrý saıasaty aıasynda palestınalyqtardyń quqyqtaryn buzýǵa qatysy bar dep tanylǵan birqatar jeke tulǵa men uıymǵa sanktsııa engizgen-di.
Izraıldiń Iordan ózeniniń Batys jaǵalaýyndaǵy qonystandyrý saıasaty halyqaralyq qaýymdastyqpen jáne Palestına avtonomııasymen qarym-qatynastaǵy negizgi túıtkilderdiń biri sanalady.
Sondaı-aq bul másele palestınalyqtarmen beıbit kelisimge qol jetkizý jolyndaǵy basty kedergilerdiń biri bolyp otyr. Palestınalyq tarap bul saıasatty evreı memleketiniń Palestına aýmaqtaryndaǵy yqpalyn nyǵaıtý áreketi retinde qabyldaıdy.
Aıta keteıik, buǵan deıin Tel-Avıvtegi Eýroodaq delegatsııasy ornalasqan aýdanǵa zymyran qulaǵanyn jazdyq.
Sondaı-aq Eýrokomıssııa EO elderin shekaralyq baqylaýdy kezeń-kezeńimen toqtatýǵa shaqyrdy.
