Eýropamen vızasyz rejımge kóshý úshin qandaı jumys júrgizilip jatyr
ASTANA. KAZINFORM – Qazaqstan Eýropalyq odaqpen vızasyz rejımge qol jetkizýdi kózdeıdi. Qazir taraptar vıza alý rásimderin jeńildetý jáne qajetti qujattar sanyn azaıtý máselesin talqylap jatyr. Bul týraly Syrtqy ister mınıstri Muhtar Tileýberdi Aqorda kýlýarynda málimdedi.
Onyń sózinshe, Qazaqstan men Eýropalyq odaq aldaǵy úsh jylǵa arnalǵan jol kartasyn bekitýdi josparlap otyr. Qujatta taraptardyń birlesip ótkizetin is-sharalary qamtylady.
Sonyń ishinde vızalyq máselelerge de basymdyq berilgen. Bul baǵytta Eýropalyq komıssııamen tıisti jumys júrgizilip jatyr.
– Árıne, bolashaqta vızasyz rejımge qol jetkizemiz degen úmit bar. Biraq qazir birinshi kezekte vıza alý rásimderin jeńildetip, qajetti qujattar sanyn azaıtýdy kózdep otyrmyz, – dedi Muhtar Tileýberdi.
Mınıstrdiń aıtýynsha, Qazaqstan men Belgııa arasyndaǵy yntymaqtastyq ekonomıkalyq baılanystarmen shektelmeıdi. Taraptar mádenıet, salt-dástúr, bilim jáne ǵylym salalaryndaǵy áriptestikti de keńeıtýdi josparlap otyr.
Osy oraıda erteńgi bıznes-forýmda 17 kommertsııalyq kelisimge qol qoıý kózdelgen. Al ýnıversıtet rektorlarynyń kezdesýinde bilim jáne ǵylym salasyndaǵy yntymaqtastyqqa qatysty 24 kelisimge qol qoıylady dep josparlanyp otyr.
Budan bólek, eki eldiń syrtqy ister mınıstrlikteri arasyndaǵy konsýltatsııalar barysynda yntymaqtastyqtyń jańa baǵyttary aıqyndalmaq. Qazir jasandy ıntellekt pen tsıfrlandyrý salasyndaǵy áriptestikti nyǵaıtý máselesine de nazar aýdarylyp otyr.
Aıta keteıik, Belgııanyń 600 jyldyq tarıhy bar ýnıversıteti Qazaqstanda «Sırek metaldardy baıytý» ortalyǵyn ashady.
Buǵan deıin Belgııalyqtar Koroli Fılıpp Qazaqstannyń baı tarıhymen jáne mádenıetimen jaqyn tanysýǵa nıetti ekenin aıtqan edi.
Óz kezeginde Memleket basshysy Qasym-Jomart Toqaev Qazaqstan men Belgııa arasynda sheshilmegen másele joq ekenin málimdedi.
