Eýropalyq jáne qazaqstandyq onkologtar qaterli isik skrınıngi jobalaryn iske asyrýda
ASTANA. 7 qyrkúıek. QazAqparat - Eýropalyq onkologııa mektebi men Qazaqstannyń onkologııalyq qyzmeti birlesken jobalar iske asyrýda.
Bul týraly búgin Astanada ótip jatqan Onkologtar men radıologtardyń VII sezi barysynda Qaterli isikpen kúres jónindegi halyqaralyq odaqtyń qurmetti prezıdenti Franchesko Kavallı rm.kz saıtyna bergen suhbatynda málim etti.
«Eýropalyq onkologııa mektebi Qazaqstannyń onkologııalyq qyzmetimen birlesip 2 joba júrgizýde. Qazir sút beziniń qaterli isigi men toq jáne tik ishek qaterli isiginiń skrınıngi boıynsha nusqaýlyq jasalýda»,- dedi Franchesko Kavallı. Oǵan qosa, Eýropalyq onkologııa mektebiniń ókilderi Qazaqstanǵa tájirıbege almasýǵa kelip turady, qazaqstandyq onkologtar men radıologtar da Eýropaǵa taǵlymdamadan ótýge jıi barady. «Onkologııalyq qyzmetke keler bolsaq, sizderdegi baza jaqsy. Biraq iri respýblıkalyq ortalyqtardyń óńirlik onkodıspanserlermen jáne ortalyqtarmen yntymaqtastyǵyn áli de jaqsarta túsý kerek»,- deıdi F. Kavallı.
Ol sondaı-aq, Qazaqstanda bilikti mamandar jumys isteıtinin aıta kelip, naýqastardy jaqsyraq emdeý úshin dárigerlerdiń onkologııa problemalaryn kóbirek talqylaýlary kerektigin basa atap kórsetti.
