Eýropalyq vırýsolog koronavırýsqa qarsy vaktsınaǵa baǵa berdi
29 qańtarda Eýropalyq dári-dármek agenttigi AstraZeneca jasaǵan koronavırýske qarsy vaktsınany maquldady. Medıtsınalyq preparattar salasyndaǵy eýropalyq organnyń málimetinshe, shvetsııalyq-brıtandyq farmatsevtıkalyq kompanııanyń vaktsınasy Covid-19 vırýsyna qarsy 66% tıimdilikke ıe.
Belgııalyq BAQ-qa bergen pikirlerinde S. Van Gýht «Pfizer» jáne «Moderna» (shamamen 94%) kompanııalary vaktsınalarynyń joǵary kórsetkishteriniń qasynda 60% tıimdilik kórsetkishin de optımızmmen qabyldaý kerek», - dep aıtty.
Mysal retinde belgııalyq maman AQSh-tyń dári-dármek jónindegi federaldy agenttigi medıtsınalyq preparatty maquldaý kezinde baqylaý kórsetkishterin 50% deńgeıinde basshylyqqa alatynyn, tumaýǵa qarsy ortasha vaktsınanyń 60% deńgeıinde tıimdiligi bar ekenin atap ótti.
AstraZeneca vaktsınasynyń 65 jastan asqan adamdarǵa qaýipsizdigi jóninde vırýsolog vaktsınany buryn maquldaǵan jáne belsendi qoldanǵan Ulybrıtanııadaǵy málimetterge súıenetinin jetkizdi.
«Aldaǵy birneshe aptada biz Ulybrıtanııadan preparattardyń egde adamdar arasyndaǵy tıimdiligi men qaýipsizdigi týraly málimetterdi kútemiz. Bul elde patsıentterdi tirkeý men baqylaýdyń jaqsy júıesi bar jáne bul málimet bizge 65 jastan asqan EO turǵyndaryn vaktsınalaýdy bastamastan buryn qoljetimdi bolady», - deıdi belgııalyq dáriger.
Vırýsolog adamdardy vaktsınatsııalaýdyń mańyzdylyǵyn da aıryqsha atap ótti.
«Barlyǵy neǵurlym tez vaktsınalansa, pandemııa soǵurlym tez jeńiledi. Eýropa odaǵynda maquldanǵan barlyq vaktsınalar osy ýaqytqa deıin tıimdi jumys istep keledi», - dep tolyqtyrdy S.Van Gýht.
