Eýropalyq velosaıahatshylar Astanaǵa keldi
ASTANA. QazAqparat - Astanaǵa arnaıy at basyn burǵan halyqaralyq «Sankt-Peterbýrg-Vladıvostok» velosherýiniń qatysýshylary óz áserlerimen bólisti, -dep habarlaıdy QazAqparat tilshisi.
22 áýesqoı saıahatshydan turatyn velosherý 10 maýsymda Sankt-Peterbýrgte bastaldy, velosaıahatshylardyń ishinde Shveıtsarııa, Germanııa jáne Avstrııadan qatysýshylar bar.
«Biz uzyndyǵy 3300 shaqyrymdy quraıtyn joldy júrip óttik jáne alǵan áserimiz mol. Qazaqstan bizdi erekshe tabıǵatymen jáne jyly júzdi adamdarymen qarsy aldy. Taǵy bir aıta keterligi - Qazaqstannyń joldarynyń qolaılylyǵy. Qazaqstanda 5 kúndeı bolyp, odan ári Novosibir, Irkýtsk, Vladıvostokqa bet alamyz», -dedi «Sankt-Peterbýrg-Vladıvostok» velosherýin uıymdastyrýshy kompanııanyń dırektory Marsel Izelı.
Velosherýshiler 3 aıdyń ishinde Reseı men Qazaqstan terrıtorııasynyń 10 myń shaqyrymyn júrip ótemiz dep josparlap otyr.
Marshrýttyń qazaqstandyq bóligi Qostanaı, Aqmola jáne Pavlodar oblystarynyń aýmaqtaryn qamtyp, barlyǵy 1500 shaqyrym qashyqtyqty quraıdy.
Uıymdastyrýshylardyń aıtýynsha, 2 shildede eýropalyq velosaıahatshylar Qostanaı oblysynyń Reseımen túıisetin shekarasynan ótip, 7 kún ishinde Astanaǵa jetti.
«Meni Qazaqstanda tań qaldyrǵany - sheksiz jazyq dala, al Astanaǵa kelsek, órkenıettiń bir bóligin jazyq dalanyń ortasyna ákelip qoıǵandaı áserde boldym. Astanada bir-birine uqsamaıtyn erekshe ǵımarattar kesheni ornalasqan, maǵan bárinen qatty unaǵany - «Báıterek» monýmenti», -dedi «Sankt-Peterbýrg-Vladıvostok» velosherýiniń eń qartań qatysýshysy 75 jastaǵy Valter Glantsman.
Velosherý qatysýshylary Qazaqstanda 5 kún bolyp, odan ári Reseı terrıtorııasynda saıahatyn jalǵastyrady. Saıahatty 8-9 qyrkúıekte Vladıvostokta ótetin Shyǵys ekonomıkalyq forýmy qarsańynda aıaqtaý josparlanǵan.
