Eýropalyq sapa menedjmenti qorynyń Jetistikti moıyndaý salasyndaǵy sertıfıkaty Astana ákimdigine tapsyryldy
ASTANA. 21 jeltoqsan. QazAqparat - 2011 jylǵy 19 jeltoqsanda Brıýsseldegi Eýropalyq sapa menedjmenti qorynyń (EFQM) shtab-páterinde Astana qalasynyń mýnıtsıpalıtetine (ákimdigi) Jetistikti moıyndaý salasyndaǵy sertıfıkatyn tabys etý saltanaty bolyp ótti.
Elorda ákimdigi resmı saıtynyń málimetine qaraǵanda, saltanat barysynda EFQM bas dırektory Per Kashe Astana qalasy ákiminiń orynbasary Erlan Qojaǵapanovqa sertıfıkatty tabys etti. Jetistikti moıyndaý salasyndaǵy EFQM Sertıfıkaty Qazaqstan elordasy ákimshiliginiń óz qyzmetinde Eýropada taralǵan basqarý sapasynyń standarttaryna sáıkes bolýǵa umtylatyndyǵyn dáleldeıdi, dep atap ótti P. Kashe.
Osylaısha, Astana qalasynyń ákimdigi Eýropalyq sapa menedjmenti qorynyń sertıfıkatyna ıe bolǵan Qazaqstandaǵy alǵashqy memlekettik mekeme atandy. Dástúr boıynsha EFQM sertıfıkatyna kommertsııalyq kásiporyndar ıe bolady, biraq sońǵy jyldary EFQM-niń iskerlik jetildirý modeli buqaralyq sektor mekemelerine, sonyń ishinde memlekettik basqarý salasynda da qoldanylyp júr. 2008 jyly EFQM sertıfıkatyn Túrkııanyń Býrsa qalasy, Polshanyń Djerjonıov qalasy 2010 jyly, al 2011 jyly Ispanııanyń Kıýdad qalasy aldy.
Saltanatty rásim barysynda Astana qalasynyń ákimdigi EFQM tabysty eýropalyq uıymdarynyń qataryna qosyldy dep atap ótildi. Bul onyń ımıdjine oń áser eteri sózsiz.
«Biz úshin sońǵy bir jyl boıy Ákim apparatynda jáne ákimdik basqarmalarynda Jetildirýdiń fýndamentaldy tujyrymdamalaryn, Jetildirý krıterıılerin engizý, sondaı-aq memlekettik organ qyzmetkerleriniń jumysyn baǵalaýǵa arnalǵan RADAR qurylǵysyn qoldaný úlken mindet júktedi», - dedi Astana qalasy ákiminiń orynbasary E. Qojaǵapanov.
Astana qalasy ákimdiginiń sapa menedjmentine baǵalaýdy EFQM músheleri asessorlar Tadeýsh Býchash, Adrıano Rýchını, Azat Ábdirahmanov, Oleg Kaınazarov júrgizdi. Olar Qazaqstan elordasy ákiminiń apparaty men 11 qalalyq basqarmalar men qurylymdardyń jumysyn zerttep, Qor jasaqtaǵan ádistemege sáıkes 9 krıterıı boıynsha saraptama jasady, Olar: kóshbasshylyq; strategııa; qyzmetkerler; áriptestik jáne resýrstar; úderister, ónim jáne qyzmetter; tutynýshylar úshin nátıjeler; qyzmetkerler úshin nátıjeler; qoǵam úshin nátıjeler; negizgi qorytyndylar.
