«Eýropalyq óreden - Eýrazııalyq ólshemge» - respýblıkalyq basylymdarǵa sholý

«Ótken apta elimiz úshin kókeıkesti máselelerdiń kómbesine aınalǵany aqıqat. EQYU-ǵa múshe memleketter men áriptes elderdiń parlamentshilerin Qazaqstanda toǵystyrǵan Transazııalyq parlamenttik forýmy «EQYU-nyń Eýrazııalyq ólshemi» taqyrybyn tekke kún tártibine shyǵarmaǵan. Kótergen máselelerin aqtaǵan forýmda EQYU-nyń eýropalyqtan eýrazııalyq sıpatqa ıe bolyp kele jatqany sát saıyn ańǵaryldy», dep jazady «Egemen Qazaqstan» gazeti «Eýropalyq óreden - Eýrazııalyq ólshemge» atty maqalasynda. Basylymnyń atap ótýinshe, parlamentshilerdiń ashyq pikirtalasy barysynda sóz alǵan EQYU Parlamenttik Assambleıasynyń Aýǵanstan jónindegi arnaýly tóraǵasy, Frantsııa Ulttyq assambleıasynyń depýtaty Mıshel Výazen Ortalyq Azııa elderinde sý resýrstary osy ýaqytqa deıin nashar basqarylyp kelgendigin alǵa tartqan. Maqta, aýyl sharýashylyǵy daqyldaryn ósirý barysynda sý qorlary lastanyp, beı-bereketsiz paıdalanylǵanynan habardarlyǵyn bildirgen. Qazaqstannyń ońtústik astanasynda ótken alqaly jıyn jaıynda egjeı-tegjeıli maǵlumat alǵyńyz kelse basylymnyń búgingi nómirine nazar aýdaryńyz.

Osy basylymnyń QR Prezıdentiniń baspasóz qyzmetine silteme jasap habarlaýynsha, Memleket basshysy Nursultan Nazarbaev qysqa merzimdi demalysqa shyqty.

Keshe Eýropadaǵy qaýipsizdik jáne yntymaqtastyq uıymynyń Іs basyndaǵy tóraǵasy, Qazaqstannyń Memlekettik hatshysy - Syrtqy ister mınıstri Qanat Saýdabaevtyń Aýǵanstan Islam Respýblıkasyna resmı sapary bastaldy. Sapar barysynda Aýǵanstan prezıdenti Hamıd Karzaımen, Syrtqy ister mınıstri Zalmaı Rasýlmen, Birikken Ulttar Uıymy Bas hatshysynyń sol eldegi arnaıy ókili Stefan De Mıstýramen, Eýropa Odaǵynyń arnaıy ókili Vıgaýdas Ýshatskaspen kezdesýler josparlanǵan. Bul týraly «Egemen Qazaqstan» gazetiniń búgingi nómirinde jaryq kórgen «Halyqaralyq sharalar tizbegi» atty maqalasynda aıtylǵan. Sondaı-aq basylymnyń jazýynsha, mamyrdyń 23-i men 26-sy aralyǵynda Túrik Respýblıkasynyń prezıdenti Abdolla Gıýl Qazaqstanǵa resmı sapar jasaıdy. «Sapar sheńberinde Abdolla Gıýldiń Elbasy Nursultan Nazarbaevpen ekijaqty kelissózderi kútilýde. Solardyń barysynda ekijaqty qatynastar jáne halyqaralyq arenadaǵy yntymaqtastyqtyń ózekti máseleleri talqylanbaq», dep jazady basylym.

«Durys damý úshin durys josparlaý kerek». «Egemen Qazaqstan» gazetiniń seısenbilik nómirinde osy taqyryppen basylǵan maqalada keshe Parlament Májilisi Tóraǵasynyń orynbasary Vladımır Bobrovtyń jetekshilik etýimen Úkimet saǵaty ótkendigi jazylǵan. «Eldiń údemeli ındýstrııalyq-ınnovatsııalyq damýynyń 2010-2014 jyldarǵa arnalǵan baǵdarlamasy týraly» taqyryby boıynsha Premer-Mınıstrdiń orynbasary - Indýstrııa jáne jańa tehnologııalar mınıstri Áset Isekeshev baıandama jasaǵan. Jarııalanymda mınıstrdiń «El Prezıdenti qoıyp otyrǵan maqsattar shynynda da aýqymdy. Óıtkeni, ol birden úsh birdeı mindetke qol jetkizýge baǵyttalǵan. Birinshisi - ındýstrııalandyrý. Ekinshisi - údemeli ındýstrııalandyrý, ol Qazaqstannyń keleshektegi damý perspektıvasyna aıtarlyqtaı serpin bermek. Úshinshisi - ınnovatsııalyq ındýstrııalandyrý. Bul tusta áńgime eńbek ónimdiligi men jańa tehnologııalar birinshi kezekke shyǵarylatyn jańa ekonomıkalyq sana týraly bolyp otyr. Kóp­egen elderde ındýstrııalandyrý úderisi birneshe kezeńderden turdy, alaıda bizge bul úsh mindetti de taıaý bes jyl ishinde sheshý qajet», degen sózi keltirilgen.

***

«Almaty ústindegi № 6 kóldiń jaǵdaıy jaıaý baqylaý arqyly qadaǵalanyp, oǵan qatysty monıtorıng júrgizilip jatyr. Buǵan qosa, selge tózimsiz ýchaskelerdiń barlyǵynda baılanys quraldarymen qamtamasyz etilgen qosymsha baqylaý turaqtary ornatyldy. Muzdyqtardaǵy kólderdi der kezinde bosatý jumystaryna daıyndyq qolǵa alyndy», dep jazady «Alash aınasy» gazeti «Mámetova muzdyǵyndaǵy kól qatań baqylaýǵa alyndy» degen taqyryppen jaryq kórgen maqalasynda. Mamandardyń málimetinshe, «Qazseldenqorǵaý» mekemesiniń qyzmetkerleri jyl saıyn, jaz mezgilinde №6 kóldiń tolyp ketpeýine jol bermeý sharalaryn júrgizedi. Arnaıy aryq boıynsha kólden 15 myńnan 20 myń tekshe metrge deıin sý shyǵarylady. «Medeý shatqalyndaǵy sel toqtatqysh plotına qazirgi ýaqytta 12,5 mln tekshe metr sý jınaı alady. Demek, budan Almaty qalasyna eshqandaı qaýip joq», - deıdi mamandar.

«Kúltegin» eskertkishinde birde-bir emlelik qateniń kezdespeýi búgingi túrkitanýshy ǵalymdardy tańdandyryp otyr. Munyń sebebin sol kezdegi mátin ázirleýshilerdiń óz isine asqan jaýapkershilikpen qaraǵandyǵynan dep túsinýge bolatyn sııaqty». Bul pikirdi «Alash aınasy» gazetiniń dástúrli «Dat!» aıdarynda suhbat bergen fılologııa ǵylymynyń doktory, professor, Qazaqstannnyń eńbek sińirgen qaıratkeri Altaı Amanjolov bildiripti. «Islam dini men Táńirshildikti bir-birine qarsy qoıyp eshkim abyroı tappaıdy» degen taqyryppen berilgen ekeýara áńgimeniń tolyq nusqasyn basylymnyń seısenbilik nómirinen oqı alasyzdar.

«Ońtústik Qazaqstan oblystyq tarıhı-ólketaný murajaıynda búginde 62526 tarıhı jádiger bar. Sonyń ishindegi Kenesary hannyń qylyshy eldiń nazaryn ózine erekshe tartady. Alaıda...», dep jazady «Alash aınasy» gazeti. Suraýly mánde turǵan sózdiń anyq-qanyǵyn basylymnyń búgingi sanyndaǵy «Murajaıdaǵy qylysh kimdiki?» degen maqaladan bile alasyzdar.

***
Keshe Respýblıkalyq bıýdjettiń oryndalýyn qadaǵalaý jónindegi esep komıtetiniń tóraǵasy Omarhan Óksikbaev depýtattar aldynda jyl saıynǵy esebin tanystyrǵan. Osyǵan oraı «Aıqyn» gazetinde «Óksikbaevtyń ókpesin kim túsinedi?!» degen taqyryppen maqala jaryq kórdi. «Qos shatyrly Parlamenttegi qalaýlylarǵa jyl saıynǵy óz esebin tanystyrýǵa kelgen Esep komıtetiniń tóraǵasy Omarhan Óksikbaev ótken jyly sheneýnikterdiń anaý-mynaý emes, jalpy somasy 254,3 mıllıard teńgege bara-bar zań buzýshylyqqa jol bergendigin jarııa etkende, depýtattardyń ózi jaǵa ustady. «Jabýly qazan kúıinde jatqan osynaý tóbe shashty tik turǵyzar jónsizdikter Óksikbaev «jaýyngerleriniń» revızııalyq tekseristeri kezinde áshkerelenipti», dep jazady basylym.

«Aıqyn» gazetiniń dástúrli «Aq sóıle!» aıdarynyń seısenbilik qonaǵy - tehnıka ǵylymdarynyń doktory, Á.Bekturov atyndaǵy «Hımııa ǵylymdary ınstıtýty» AQ-nyń vıtse-prezıdenti Ómirzaq Júsipbekov. Ekeýara áńgimeniń tolyq nusqasyn «Hımıkter agrarlyq salany ınnovatsııalaýǵa kiristi» degen taqyryppen berilgen maqaladan oqı alasyzdar.

***

«Astana aqshamy» gazetiniń búgingi nómirinde belgili ǵalym, abaıtanýshy Mekemtas Myrzahmetulymen aradaǵy suhbat «Áýezovti qalqan etip qoımasam, aıaǵymdy bastyrmaıtyn edi» degen taqyryppen jarııalandy. Basylym tilshisiniń barlyq saýaldarynda tuşymdy jaýap bergen ǵalym sóz oraıynda «Abaıdyń «tolyq adam» ilimi batysta da joq, shyǵysta da joq. Turan jerinde, qazaq jerinde paıda bolǵan ilim. Onyń arǵy kózi ál-Farabıde jatyr. Túsinikti tilmen aıtqanda, «parasatty adam». Odan keıin 1069 jyly Shýda jazylǵan «Qutadǵý bilik» degen eńbekte kezdesetin tórt keıipker «jýanmárttilik iliminiń tórt negizi eken, ony keıin bildik», deıdi.

***

«Vremıa» gazetiniń jazýynsha, Saran qalasyndaǵy «ArselorMıttal Temirtaý» AQ-yna qarasty Kúzembaev atyndaǵy shahta jumys jer asty órtiniń qaýipsizdigine baılanysty toqtatylǵan. «Oqıǵa senbi kúni keshkisin oryn aldy. Bólshekteý lavasynyń joǵarǵy jaǵynda 560 metr belgisinde kómirtegi totyǵynyń (SO) kontsentratsııasy shamadan 0,1-0,2 paıyzǵa kóterilip ketti. Shahtadan shuǵyl arada 162 kenshi qaýipsiz jerge kóshirildi. Tótenshe jaǵdaıdyń aldyn alýǵa 50 maman men 13 tehnıka jumyldyryldy», dep jazady basylym.

***

«Kazahstanskaıa pravda» gazetiniń jazýynsha, keshe Munaı jáne gaz mınıstri Saýat Myńbaev Mańǵystaýǵa jumys saparymen kelip Kaspıı teńiziniń qazaqstandyq bóliginde jaǵalaý ınfraqurylymyn damytý máselelerine arnalǵan jumys tobynyń kóshpeli otyrysyn ótkizgen. Maqalanyń tolyq nusqasyn basylymnyń búgingi nómirinen oqı alasyzdar.