Eýropalyq Odaqtyń ekspertteri turmystyq zorlyqtyń aldyn-alý tásilderin Qazaqstandyq polıtseılerge oqytýda
ALMATY. Mamyrdyń 13-i. QazAqparat /Názıra Eleýhan/ - Búgin Almatyda quqyq qorǵaý organdarynyń turmystyq zorlyqpen kúres qyzmetin qoldaý boıynsha óz jumysyn bastaǵan trenıngte turmystyq zorlyqtyń aldyn-alý jáne onymen kúres máseleleri talqylanýda,
dep habarlaıdy QazAqparat.
Atalmysh trenıng Eýropalyq Odaqtyń qoldaýymen ótýde. Oǵan Qazaqstannyń ishki ister organdarynyń qyzmetkerleri qatysýda.
«Polıtseıler bılik ókilderi bolyp sanalǵandyqtan, olarmen tyǵyz yntymaqtastyqtyń biz úshin mańyzy zor. Bul qarym-qatynastyń mehanızmin biz uzaq jyl qurdyq, al búgingi trenıng bolashaqtaǵy yntymaqtastyqqa maqsattalǵan. Búgin trenıng barysynda bizdiń ishki ister organdarynyń qyzmetkerleri Gollandııanyń tájirıbesimen tanysady. Meniń pikirimshe, Gollandııanyń tájirıbesi paıdaly, óıtkeni, turmystyq zorlyqpen kúres boıynsha olar jaqsy kórsetkishke jetken. Sondyqtan, biz úshin gollandııalyq polıtseılerdiń tájirıbesin úırený, ádis-tásilderin meńgerý mańyzdy», dep atap ótti «Qurbylar» daǵdarys ortalyǵynyń prezıdenti, turmystyq zorlyq salasynyń eksperti Nadejda Gladyr. Onyń aıtýynsha, elimizde jyl saıyn otbasy-turmystyq qatynas máselelerinen 500-den asa áıelder dúnıeden ótedi.
Trenıng barysynda ol «turmystyq zorlyqtyń aldyn-alý boıynsha» QR Zańy 2010 jyldyń qańtar aıynyń 1-nen bastap zańdyq kúshine engendigin eske saldy.
Nıderland elinen kelgen polıtseı Gıdeon Haýstyń aıtýynsha, onyń elinde turmystyq zorlyq - bul qaýipsizdik máselesi, munda mańyzdy ról atqaratyn bizdiń polıtseıler men sot jáne jergilikti bılik organdarynyń róli zor. «Turmystyq zorlyqtyń áleýmettik másele ekenin, ashyq aıtyp, sheshý joldaryn ár túrli deńgeıde qabyldaý kerektigin túsingendikten, bizde ár túrli jobalar men baǵdarlamalar qabyldandy», dep atap ótti shet eldik polıtseı Gıdeon Haýs.
Trenıngke qatysýshylar gollandııalyq uıymnyń jumysymen tanysty.
Eýropalyq Odaqtyń Nıderlandııadaǵy Hıvos gýmanıstik ınstıtýtynyń jáne «Qurbylar» daǵdarys ortalyǵynyń «Áıelderge qatysty zorlyqpen kúres boıynsha quqyq qorǵaý organdary qyzmetin kúsheıtý» jobasy 2008 jyldyń maýsym aıynan beri iske asyp keledi. Bul jobany iske asyrýǵa 180 000 eýro qarajat bólingen.
