Eýropalyq Odaq – Ortalyq Azııa ekonomıkalyq forýmynda qandaı máseleler kóterildi
Álıhan Smaıylov forýmnyń óńiraralyq dıalogty nyǵaıtýǵa erekshe yqpal etetinin jetkizdi.
«Joǵary deńgeıde ótken otyrysta biz ózara iskerlik baılanystyń aýqymyn keńeıtý boıynsha jan-jaqty pikir almastyq. Bul rette óńirdiń ekonomıkalyq turaqtylyǵy birinshi kezekte bizdiń ortaq kúsh-jigerimiz ben naqty qadamdarymyzǵa baılanysty ekenin atap ótken jón. Ol úshin erkin básekeni damytý, ınvestıtsııa tartý, jańa jumys oryndaryn qurý, bıznesti qoldaýǵa basymdyq berý qajet», - dedi Álıhan Smaıylov.
Onyń sózinshe, jasyl ekonomıkany damytý men tsıfrlandyrý máselesine erekshe kóńil bólindi.
«Atap aıtqanda, klımattyń ózgerýine qarsy kúsh biriktirý týraly jalpy túsinistikke qol jetti. Ortalyq Azııadaǵy ekologııalyq qaýipsizdikti qamtamasyz etý joldary, onyń ishinde sý resýrstaryn tegin paıdalaný máselesi keńinen talqylandy. Óńir ishindegi jáne Ortalyq Azııa men Eýropa arasyndaǵy ózara kólik baılanysyn jaqsartý taqyryby da qozǵaldy. Bul oraıda Ortalyq Azııanyń kólik ınfraqurylymyna ınvestıtsııa tartý jónindegi jol kartasyn ázirleý jóninde kelisim jasaldy», - dedi Premer-Mınıstr.
Álıhan Smaıylov QR Úkmieti Eýropalyq ınvestıtsııa bankiniń Orta Azııada eki óńirlik ókildigin ashý týraly bastamasyn qoldaıtynyn aıtty.
«Bul óz kezeginde ınvestıtsııa tartýǵa tyń serpin beretinin atap ótkim keledi. Jalpy biz Ortalyq Azııa men Eýropalyq Odaq arasyndaǵy dástúrli qarym-qatynas halyqtarymyzdyń ıgiligi úshin damı beredi dep senemiz», - dedi QR Premer-mınıstri Álıhan Smaıylov.