Eýropalyq odaq ókili Qazaqstanda qaldyq óńdeýmen aınalysatyn kásiporyndardy kóptep ashýdy usyndy

Nur-Sultan qalasynda mınıstrlikter men óndiristik oryndardan shaqyrylǵan 30-dan astam qazaqstandyq sarapshy maman sý sapasyn baqylaýda ustaýdyń eýropalyq tásilderin meńgerdi.

Oqý kýrsy Halyqaralyq jasyl tehnologııalar jáne ınvestıtsııalyq jobalar ortalyǵynyń bastamasymen jáne Eýropalyq odaqtyń qarjylaı qoldaýymen ótkizildi.

Atalmysh uıymnyń Qazaqstandaǵy yntymaqtastyq bóliminiń basshysy Iohannes Medsen Ortalyq Azııadaǵy sý kózderiniń lastaný qarqyny alańdarlyq jaıt ekenin aıtady.

«Bul kýrstar qoldanystaǵy qorshaǵan orta týraly zańnama men onyń iske asyrylý barysyn bir-birine jaqyndatatyn bolady. Klımattyń ózgerýi, qorshaǵan ortany qorǵaý, sý resýrstaryn tıimdi paıdalaný máselesi Ortalyq Azııa úshin óte ózekti. 3 kúndik semınarda osy saladaǵy eýropalyq ozyq tásilder tanystyryldy. Naqty iske keler bolsaq, Qazaqstandaǵy qatty qaldyq polıgondaryn jabý kerek. Qazirgi jaǵdaıda polıgondar topyraqty, sý kózderin lastap jatyr. Olardyń ornyna ekologııalyq talaptarǵa saı jańa tıptegi nysandar salý kerek» , -dedi Iohannes Medsen.

Eýropalyq odaq ókili mundaı betburys memlekettiń qoldaýynsyz alǵa baspaıtynyn aıtady.

«Sizderge qaldyq óńdeýmen aınalysatyn kásiporyndar qajet. Olardyń meılinshe kóp bolǵany durys. Buǵan memleket tikeleı muryndyq bolýy tıis. Qaldyq óńdeý isi qorshaǵan ortany qorǵaý jobasy retinde ǵana qarastyrylmaı, balama energııa kózin alatyn, kásipker úshin tabysy mol kásip retinde qoldaý tabýy tıis», -deıdi Iohannes Medsen.

Úsh kúndik semınarǵa qatysqan qazaqstanyq sarapshylarǵa Eýropalyq odaqtyń arnaıy sertıfıkaty tabystaldy.