Eýropalyq odaq Qazaqstandaǵy demokratııany damytýǵa 3 mln eýro bólip otyr
ASTANA. QazAqparat - Búgin Eýropalyq odaqtyń Astanadaǵy keńsesinde demokratııa men azamattyq qoǵamdy damytýdy kózdeıtin birqatar jobalar rásimdeldi. Atalǵan jobalardy úkimettik emes uıymdar iske asyrady. Al Eýroodaq sonyń bárine 3,7 mln eýronyń 85 paıyzyn bólip otyr, dep xabarlaıdy QazAqparat tilshisi.
Eýropalyq odaqtyń elshisi Traıan Hrısteanyń aıtýynsha, osydan úsh jyl buryn Qazaqstan ortasha tabysy bar memleketter sanatyna qosylǵannan keıin qarjylaı qoldaý sharalary toqtatylǵan edi. Alaıda 2014-2020 jyldarǵa arnalǵan Ortalyq Azııa boıynsha aımaqtyq baǵdarlamasy aıasyndaǵy yntymaqtatyq jalǵasa beredi. «Máselen, qazirgi kezde Eýropalyq odaqtyń Qazaqstandaǵy ókildigi «jasyl» ekonomıkaǵa arnalǵan birqatar jobalardy iske asyrýda. Oǵan 7,1 mln eýro bólindi. Sondaı-aq sot reformasyn qoldaý sharalaryna 12 mln eýro berilgen edi», - deıdi Hrıstea myrza.
Jańa toǵyz jobanyń ishinde de sot reformasyn qoldaý sharalary qarastyrylǵan. Budan bólek, jergilikti ózin-ózi basqarý ınstıtýtyn nyǵaıtý, demokratııa men adam quqyqtaryn qorǵaý sııaqty maqsat-mindetter bar. Túptiń-túbinde xalyqtyń saıası-ekonomıkalyq belsendiligin kóterip, eldiń ál-aýqatyn kóterý kózdelgen. Osyǵan oraı, aýyldy jerlerde birqatar bastamalardy iske asyrý josparlanyp otyr.
