Eýropalyq Odaq álemdegi shıelenis aımaqtaryndaǵy máselelerdiń uzaqqa sozylýyna alańdaýly
ASTANA. 28 qarasha. QazAqparat /Aıdar Ospanalıev/ -Eýropalyq Odaq daǵdarysqa ushyraǵan shıelenis aımaqtaryn retteýde naqty jetistikterge qol jetkizýdi ańsap otyr. Sebebi atalmysh shıelenisterge qatysty máseleler uzaqqa sozylǵan saıyn qalyń kópshiliktiń Eýropalyq Odaqqa degen senimi de álsirep barady.
Bul týraly búgin Astanada ótip jatqan EQYU sammıtiniń Sholý konferentsııasynyń plenarlyq májilisinde Eýropalyq Odaq atynan sóz alǵan Belgııa memleketiniń ókili málim etti.
Onyń pikirinshe, Grýzııa, Moldova, Taýly Qarabaq, sııaqty aımaqtardaǵy shıelenisterdi sheshý úshin halyqaralyq deńgeıde kúsh biriktirgen abzal. Bul rette Eýropadaǵy qaýipsizdik jáne yntymaqtastyq uıymynyń aıasynda jáne ózge de halyqaralyq deńgeıde qol qoıylǵan qujat talaptary keńinen paıdalanylýy qajet. «Osy oraıda aıta ketetin másele Grýzııa men Moldovanyń terrıtorııalyq tutastyǵy men atalmysh elderdiń derbestigin qamtamasyz etý prıntsıpteri basty nazarǵa alynýy kerek. Al Taýly Qarabaq máselesi Madrıd ustanymdary negizinde sheshilgeni durys», - dedi Belgııanyń ókili.
