Eýropalyq ınvestıtsııalyq bank Almatyda birqatar jobalardy júzege asyrýǵa nıetti
ALMATY. Mamyrdyń 21-i. QazAqparat /Erbol Azanbek/ -Almaty ákimi Ahmetjan Esimov Eýropalyq ınvestıtsııalyq bank (EIB) ókilderimen kezdesip, kelissóz júrgizdi,
dep habarlaıdy qala ákiminiń baspasóz qyzmeti.
Eýroodaq tarapynan qazirgi ýaqytta Ortalyq Azııa elderinde energetıkalyq, kólik ınfraqurylymy, ekologııa salasy boıynsha 1 mıllıard eýro kóleminde ınvestıtsııaldyq jobalardy qarjylandyrý qarastyrylýda. Osy baǵytta Elbasy Nursultan Nazarbaevtyń 10 sáýirde Belgııa sapary barysynda Qazaqstan men EIB arasynda ınvestıtsııalyq jobalardy júzege asyrý týraly kelisimge qol qoıylǵany belgili. Osy kelisim negizinde, ınvestıtsııalyq jobalar toptamasyn qalyptastyrý maqsatynda elimizge kelgen EIB ókilderi Almatyǵa at basyn buryp, birqatar máselelerdi talqylady. Shet eldik qonaqtar Almatyǵa qyzyǵýshylyqtary barlyǵyn atap ótip, energosaqtaý, ekologııalyq qaýipsizdik máseleleri boıynsha birikken jobalardy júzege asyrýǵa daıyn ekendikterin bildirdi. Kezdesý barysynda Almaty ákimi JES-terdi gazǵa aýystyrý, sý sharýashylyǵyndaǵy modernızatsııalaý, energosaqtaý men qoǵamdyq kólikti damytý máseleleri boıynsha josparlarymen bólisti. «EIB-pen áriptestik biz úshin úlken qyzyǵýshylyq týdyrady. Bizde naqty jobalar bar. Sondyqtan naqty is-sharalarǵa kóshýge daıynbyz», dedi qala ákimi.
