Eýropalyq dızaın ınstıtýty Qazaqstan jastaryn oqýǵa shaqyrdy
ASTANA. QazAqparat - Kazakhstan Fashion Week Astana jáne Eýropalyq dızaın ınstıtýty (Istituto Europeo di Design) qazaqstandyq jas dızaınerler arasynda "Fashion for future" baıqaýyn jarııalady, dep habarlaıdy QazAqparat tilshisi.
Úzdik dep tanylǵan úsh úmitker Italııanyń Mılan qalasynda bilimderin jetildire alady.
«Eýropalyq dızaın ınstıtýtymen (Istituto Europeo di Design) bekitilgen kelisimshart aıasynda bıyldan bastap, KFW Astana jáne IED jas dızaınerlerge arnalǵan "Fashion for future" baıqaýyn ótkizedi. Nátıjesinde IED qazaqstandyq jas dızaınerlerge úsh grant bóledi, ıaǵnı úsh úzdik dızaıner Mılan qalasynda bilimderin jetildire alady», - dedi Kazakhstan Fashion Week jobasynyń bas prodıýseri Irına Baıjanova Astananyń basty sán aptalyǵyna arnalǵan baspasóz máslıhatynda.
Eýropalyq dızaın ınstıtýtynyń óńirlik menedjeri Olga Melkova Fashion for future baıqaýynyń EKSPO-2017 kórmesimen tikeleı baılanysty ekenin atap ótti.
«Alǵashynda «Fashion for future» baıqaýyn Almaty tehnologııalyq ýnıversıteti men Qazaqstan tehnologııalar jáne bıznes ýnıversıtetimen birlesip, EKSPO-2017 aıasynda uıymdastyryp edik. Baıqaý barysynda talantty jastardyń kóp ekenin ańǵardyq. Otyzǵa jýyq jas dızaınerdiń jumysyn jınadyq, olardyń árqaısysymen jeke suhbattastyq. Nátıjesinde, Darıǵa Taıshyqova jeńimpaz atanyp, Italııaǵa oqýǵa attandy», - dedi ol.
EKSPO-2017 halyqaralyq kórmesi aıaqtalsa da, Eýropalyq dızaın ınstıtýty baıqaýdy jalǵastyrýdy jón kórgen.
«Kazakhstan Fashion Week Astana tarapynan baıqaýdy jalǵastyrý týraly usynys túskende, birden qabyldadyq. Sebebi, Eýropada jańashyldyq izdeımiz, jańa mádenı erekshelikterdi ashqymyz keledi. Qazir bar nazarymyz Ortalyq Azııaǵa túsip otyr», - dep óz sózin túıindedi O.Melkova.
Instıtýt ókiliniń aıtýynsha, baıqaýǵa ótinimder sáýir aıynda qabyldana bastaıdy.
Eske sala ketsek, elordada Kazakhstan Fashion Week Astana aptalyǵy bastaldy. Bıyl KFW Astana tarıhynda tuńǵysh ret tanymal ıtalııalyq dızaınerler óz toptamalaryn tanystyryp, qatysýshylarǵa «Sán jáne bıznes», «Jańa trendter» taqyrybynda sheberlik sabaqtaryn ótkizip jatyr.
Atap aıtqanda, Vogue Italy jýrnalynyń redaktory, stılıst Rıkardo Tertso, Eýropalyq dızaın ınstıtýtynyń kreatıv-dırektory Djovannı Ottonello, dızaınerler - Salvatora Vıgnola men Federıko Baratstso Astanaǵa arnaıy keldi.
Eýropalyq dızaın ınstıtýtynyń (Istituto Europeo di Design) kreatıv-dırektory Djovannı Ottonello qazaqstandyq dızaınerlerdiń portfolıosyn baǵalap, qundy keńesterimen bólispek.
