Eýropalyq banktiń tarıf reformasy Óskemendegi eki kompanııaǵa engiziledi
«Yntalandyrýshy tarıf» degen at alǵan jańa reformanyń qarapaıym turǵyndarǵa qanshalyqty tıimdi bolatyny áli belgisiz. Bir anyǵy, tarıf taǵaıyndaý tártibinde qazirgideı qaǵazbastylyq bolmaıdy dep kútilýde. Bul týarly Óskemenge arnaıy kelgen QR Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti tóraǵasynyń orynbasary Asan Darbaev aıtty.
«Búginge deıin tarıf qyzmet kórsetýshi kompanııalardyń shyǵynyna sáıkes eseptelip kelse, keleshekte ol kommýnaldyq qyzmet sapasyn arttyrýǵa baǵyttalmaq. Ondaı tarıftiń halyqtyń qaltasyna qalaı áser etetini ázirge belgisiz. Sol úshin Qyzylorda jáne Qostanaı oblystarynda birneshe kompanııaǵa osy júıeni engizip, synaqtan ótkizip jatyrmyz. Bes jyldyń ishinde jańa júıeniń artyqshylyqtary men kemshilikteri anyq bolady. Reformany usynyp otyrǵan - Eýropa damý jáne qaıta qurý banki. Qarjy alpaýyty eldegi kommýnaldyq ınfraqurylymdy jańǵyrtýǵa ınvestıtsııa salmaqshy. Bul ınvestıtsııa uzaq merzimge tómen paıyzben berilgen nesıe túrinde beriledi. Salynǵan ınvestıtsııa tıimdiligi úshin Eýropalyq bank eldegi tarıf júıesine reforma engizip, kommýnaldyq qyzmet kórsetýshi kompanııalardyń tabysqa jumys isteýin qamtamasyz etpek» - deıdi komıtet ókili.
Jańa júıe boıynsha kórsetiletin kommýnaldyq qyzmettiń sapasy kún saıyn saralanyp otyrady. Eger jylý qyzmet sapasy nasharlaǵan bolsa, kompanııa aıyppul tóleıdi.
Sarapshylar tarıf reformasyn júrgizbes buryn áýeli turǵyn úı járdemaqysyn tóleý júıesine ózgeris engizý kerek degen eskertý aıtty. «Qala ekonomıkasynyń ınstıtýty» qorynyń ókili Irına Gentsler áleýmettiń osal toptaryna tarıf turaqsyzdyǵynan qorǵaýdyń birneshe tásilin usyndy.
Oblys ákiminiń orynbasary Serik Aqtanov tarıf taǵaıyndaý tártibin reformalamas buryn áleýmettik jaǵdaıy osal toptardyń múddesi eskeriletinin atap ótti. Ázirge jańa tásil áli saralanýda. Eýropalyq bank ókilderi reformanyń ilkimdi jobalaryn Óskemendegi «ÝK TETs» jáne «Óskemen jylý jelileri» kompanııalaryna engizýdi usynyp otyr. Ákimdik ókilderi bul usynys áli zerdeleýdi talap etetinin aıtty.
