Eýropalyq bank Pavlodar qalasyn jaryqtandyrýǵa 2,6 mlrd teńge nesıe bóldi
ASTANA. QazAqparat - Eýropa qaıta qurý jáne damý banki (EQDB) Pavlodar qalasyn jaryqtandyrý jumystaryna 2,6 mlrd teńge nesıe bóldi, dep habarlaıdy QazAqparat tilshisi.
EQDB Pavlodar qalasynyń jaryqtandyrý júıesin jetildirýge, paıdalanýǵa jáne qyzmet kórsetýge jaýapty «EverlightAlto» konsortsıýmyna 2,6 mlrd teńge somaǵa nesıe berdi.
Atap ótilgendeı, qazirgi tańda kóshedegi shamdardyń 82% jýyǵy joǵary qysymdy jáne gaz razrıadty natrıılik, sapasy da óte tómen. Syrtqy jaryqtandyrýdy baqylaý shkaftarynyń 60% jaramsyz bolyp qalǵan. Endigide olar 12 myń jaryq-dıodty shamdar men syrtqy jaryqtandyrýdy basqarýdyń 70 zamanaýı shkafyna almastyrylady.
Syrtqy jaryqtandyrý júıesin tıimdi basqarý úshin energııa tutynýdy tómendetýge jáne paıdalaný shyǵyndaryn ońtaılandyrýǵa áser etetin avtomattandyrylǵan apparattyq jáne baǵdarlamalyq júıeler ornatylatyn bolady.
Kelisimge búgin Astanada qalasynda qol qoıyldy.
Aıta keteıik, qazirgi kúnde EQDB Qazaqstan ekonomıkasyna 8,7 mıllıardtan astam AQSh dollaryn ınvestıtsııalady.
Dáýlet Іztileý
