Eýropalyqtar týrızmnen sharshady: Barselona men Venetsııa halqy narazylyqqa shyqty

ASTANA. KAZINFORM — Ispanııa men Italııanyń birneshe qalalarynda shamadan tys kóp týrısterge qarsy narazylyq sharalary ótti. Mıtıngke shyqqandar saıahatshylardyń sanyn azaıtýdy talap etip otyr, dep jazdy DW.

15 maýsym kúni, saıahatshylar arasynda tanymal Ispanııa men Italııa qalalarynda baqylaýsyz týrızmge qarsy demonstratsııalar uıymdastyryldy. Reuters agenttiginiń málimetinshe, Barselonada shamamen 600 adam qatysqan mıtıng kezinde halyq: «Seniń demalysyń — meniń qaıǵym» dep urandap, «Jappaı týrızm qalany joıady» jáne «Olardyń ashkózdigi bizdi qurtady» degen jazýy bar plakattar ustap shyqty.  Keıbir belsendiler sý tapanshasymen atyp, dúkender men qonaq úılerdiń terezelerine «Týrıster, úılerińe qaıtyńdar!» degen jazýy bar japsyrmalar japsyrǵan.

Reuters-tiń dereginshe, halqy 1,6 mıllıon adamdy quraıtyn Barselona ótken jyly 26 mıllıon týrıst qabyldaǵan.

Venetsııa turǵyndary jańa qonaq úılerge qarsy

Týrıstik aǵyndy shekteýdi talap etken narazylyqtar Ońtústik Eýropanyń basqa da qalalarynda ótti. Ispanııada — Malaga, Palma-de-Maıorka, San-Sebastıan, Granada jáne Ibıtsa aralynda; Italııada — Genýıa, Palermo, Neapol, Mılan jáne Venetsııa qalalarynda. Venetsııada narazylyq bildirýshiler 1500 týrısti qabyldaı alatyn eki jańa qonaq úıdiń salynýyna qarsy shyqty.

Reuters agenttigi 2025 jyly Eýropada halyqaralyq saparlarǵa jumsalatyn shyǵyndar 11%-ǵa ósip, 838 mıllıard AQSh dollaryna (727 mıllıard eýro) jetýi múmkin dep boljaıdy.  Frantsııa men Ispanııada týrıst qabyldaý rekordtyq kórsetkishke jetýi múmkin degen boljam bar.