Eýropalyq sarapshylar Qazaqstandaǵy turmystyq zorlyq-zombylyqty qylmys dep sanaıtyn zańnyń qabyldanýyn qoldady
ASTANA. KAZINFORM – 18 sáýirde Eýropalyq keńestiń Parlamenttik Assambleıasy saıtynda «Qazaqstannyń Adam quqyqtary, demokratııa jáne Eýropa keńesimen yntymaqtastyq salasyndaǵy ilgerileýi» atty jazbasha deklaratsııa jarııalandy.
Oǵan birinshi bolyp Vengrııa parlamentshisi, EKPA-daǵy ulttyq delegatsııanyń basshysy Jovt Nemet qol qoıǵan. J.Nemet Kazinform agenttiginiń tilshisine bergen suhbatynda EKPA-nyń 22 múshesi Eýropalyq keńes pen Qazaqstan arasyndaǵy baılanystardy damytýdy jáne QR-daǵy reformalardy qoldaıtynyn atap ótti.
«Eýropa keńesi men Qazaqstan arasyndaǵy qarym-qatynasta jańa ózgerister bolyp jatyr. Qazaqstan Respýblıkasyndaǵy saıası reformalardyń damýyn atap ótkim keledi jáne qazaqstandyq saıasatkerlerdi Eýropa keńesimen baılanystardy tereńdetýge shaqyramyn», - dedi vengrııalyq parlamentarıı.
Strasbýrgtegi EKPA-nyń frantsýzdyq sarapshysy Karla Dýat elimizdegi oqıǵalarǵa toqtaldy.
«Qazaqstanda turmystyq zorlyq-zombylyqty qylmystyq jaýapkershilikke tartatyn zańnyń qabyldanýy – durys sheshim. Bul týraly Qazaqstanda bolyp kelgen senatorlar jan-jaqty habardar etti. Bul Qazaqstan Respýblıkasy men Eýropa keńesi arasyndaǵy yntymaqtastyqtyń 20 jyldyǵyn eskeretin erekshe sát», - dedi K.Dýat.
Belgııanyń Gent ýnıversıteti doktorantýrasynyń qyzmetkeri jáne Ulybrıtanııadaǵy Sent-Endrıýs ýnıversıtetiniń Taıaý Shyǵys, Ortalyq Azııa jáne Kavkaz zertteýleri ınstıtýtynyń ǵylymı qyzmetkeri Karolına Klıýchevska NE Global basylymyna turmystyq zorlyq-zombylyqty krımınalızatsııalaý mańyzdy qadam ekenin aıtty.
«Ózgerister kámeletke tolmaǵandarǵa jasalǵan zorlyq-zombylyq úshin jazany kúsheıtedi. Túzetýler sońǵy birneshe jylda qoǵamda keńinen talqylandy. Olar sondaı-aq genderlik zorlyq-zombylyq týraly qoǵamdyq pikirtalastar men nóldik tózimdilikke shaqyrý qaıta bastalǵanyn eskere otyryp, mańyzdy sátte oryn aldy», - dedi K.Klıýchevska.
Sarapshy sondaı-aq «NE Global»-ǵa Qazaqstandaǵy jańa zańdar, eń aldymen, Eýroodaqtyń nemese basqa da syrtqy oıynshylardyń yqpalynan emes, ishki dınamıkaǵa reaktsııadan týyndaǵanyn eske saldy.
«Alaıda zańdardyń is júzinde qalaı júzege asyrylatyny jáne quqyq qorǵaý organdarynyń turmystyq zorlyq-zombylyq jaǵdaılaryna qanshalyqty jaýap beretini áli belgisiz. Óıtkeni dál osy deńgeıde zorlyq-zombylyq jaǵdaılary jıi eskerilmeıdi», - dep eskertedi sarapshy.
Aıta keteıik, 15 sáýirde Prezıdent áıel quqyǵy men balalardyń qaýipsizdigin qamtamasyz etetin zańdarǵa qol qoıǵan edi.
