Eýropalyq ortalyq bank basshysy merziminen buryn otstavkaǵa ketý týraly qaýesetke jaýap berdi

ASTANA. KAZINFORM — Krıstın Lagard Eýropalyq ortalyq bank basshysy qyzmetindegi ókilettik merzimin tolyq aıaqtaıtynyn málimdedi. Bul týraly Kazinform agenttiginiń Brıýsseldegi menshikti tilshisi habarlaıdy.

Onyń aıtýynsha, «negizgi jospary» – 2027 jyldyń qazan aıynda aıaqtalatyn prezıdenttik merziminiń sońyna deıin qyzmetin jalǵastyrý.

— Biz kóp jetistikke jettik, men de óz úlesimdi qostym dep oılaımyn. Qol jetkizgen nátıjelerdi nyǵaıtyp, olardyń berik ári senimdi bolýyn qamtamasyz etýimiz qajet. Bul meniń merzimimniń sońyna deıin ýaqytty talap etedi, — dedi ol The Wall Street Journal gazetine bergen suhbatynda.

Bul málimdeme Financial Times basylymynda jarııalanǵan, «onyń kózqarastarymen tanys derekkózge» silteme jasaǵan maqala shyqqannan eki kún ótken soń jasaldy. Atalǵan materıalda Lagardtyń merziminen buryn ketýi múmkin degen boljam aıtylǵan edi.

Maqalada sondaı-aq EOB-tyń kelesi prezıdentin taǵaıyndaý úderisi jedeldetilýi múmkin ekeni, bul Frantsııada yqtımal ásire ońshyl prezıdenttiń bul sheshimge yqpal etý múmkindigin shekteý úshin jasalýy yqtımal ekeni jazylǵan. Qazirgi Frantsııa prezıdenti Emmanıýel Makron kelesi jyldyń sáýir aıynda qyzmetinen ketýi tıis.

Lagard saıası yqpal arqyly EOB táýelsizdigine nuqsan keltirýi múmkin degen joramaldardy joqqa shyǵardy.

— EOB – bedeldi ári senimdi uıym. Men onyń jumysyna óz úlesimdi qostym dep úmittenemin, — dedi ol.

Krıstın Lagard 2019 jylǵy 1 qarashadan beri Eýropalyq ortalyq bankti basqarady. Onyń ókilettik merzimi 8 jylǵa eseptelgen jáne 2027 jyldyń qazanynda aıaqtalady.