Eýropalyq odaqtyń Qazaqstandaǵy Elshisi otandastarymyzdy Naýryz meıramymen quttyqtady

– Naýryz – erekshe ári maǵynaly mereke. Bul meıram maǵan óte unaıdy, men árdaıym ony erekshe yqylaspen atap ótemin. Qazirgi tańda merekeniń 10 kúnge deıin uzartylyp, ár kúnniń ózindik mánge ıe bolýy tamasha bastama boldy, - dedi elshi. 

Sonymen qatar elshi ulttyq kıim kúnin de atap ótti. 

– Men keshe ulttyq kıim kıdim, búgin keshke jáne erteń de kııýdi josparlap otyrmyn. Bul – óte keremet dástúr, - dedi ol.

Sondaı-aq Aleshka Sımkıch Qazaqstan halqyna izgi tilegin jetkizdi.

– Barsha qazaqstandyqtardy Naýryz meıramymen shyn júrekten quttyqtaımyn! Qazaqstanǵa bereke, molshylyq jáne órkendeý tileımin, - dedi elshi.

Sóz sońynda ol Ulttyq mýzeıde ótetin merekelik is-sharaǵa qatysatynyn atap ótti. 

Buǵan deıin Qazan Federaldyq ýnıversıtetiniń qoldaýymen kóktem men jańarýdy toılaý – Naýryz merekesi keń kólemde atalyp ótkenin jazǵanbyz. 

Atadan qalǵan asyl dástúr boıynsha naýryz kóje – Naýryz meıramy qarsańynda daıyndalatyn qasıetti as. Ulystyń uly kúni ár shańyraq bul taǵamdy molshylyq pen berekeniń nyshany retinde ázirlep, jańa jyldy aq tilekpen qarsy alýǵa mán beredi. 

Sondaı-aq Astanada Qazaqstandaǵy dıplomatııalyq korpýs ókilderi, halyqaralyq uıymdar men sheteldik seriktes qurylymdar qatysqan «Naýryz baly» ótti. Merekelik is-sharany Qazaqstan Mádenıet jáne aqparat mınıstrligi dástúrli túrde uıymdastyryp keledi.