Eýropalyq Odaqta elektromobılderge degen qyzyǵýshylyq tómendedi

ASTANA. KAZINFORM — 2024 jyly Eýropalyq Odaqta (EO) jańa kólikter arasyndaǵy elektromobılderdiń úlesi 13,6%-ǵa deıin tómendedi. Bul — 2015 jyldan beri alǵash ret tirkelgen tómendeý, dep jazdy AZÁRTADJ.

AZÁRTADJ Eýropalyq statıstıkalyq basqarma (Evrostat) taratqan sońǵy esepke silteme jasaı otyryp habarlaǵandaı, byltyr EO elderinde tek akkýmýlıatormen jumys isteıtin 1,45 mıllıon jańa avtokólik tirkelgen. Bul 2023 jylmen salystyrǵanda 6,1%-ǵa az.

Salystyrý úshin aıta ketsek, 2023 jyly bul kórsetkish 1,55 mıllıon bolǵan. Sarapshylar bul qubylysty el turǵyndarynyń elektromobılderge qyzyǵýshylyǵynyń tómendeýimen túsindiredi.

2015 jyldan 2023 jylǵa deıin elektromobılder sany jyl saıyn orta eseppen 58%-ǵa artyp otyrǵan. Jalpy alǵanda, 2024 jyldyń sońyna qaraı EO aýmaǵynda 5,87 mıllıon akkýmýlıatormen jumys isteıtin kólik paıdalanylyp jatyr. Bul 2023 jylmen salystyrǵanda 32,4%-ǵa kóp (sol jyly 4,43 mıllıon bolǵan).

Elektromobılder úlesi boıynsha eń joǵary kórsetkishter Danııada (51,3%), Maltada (37,7%) jáne Shvetsııada (34,9%) tirkelgen. Al Ońtústik jáne Ortalyq Eýropa elderinde bul kórsetkish óte tómen. Máselen, Horvatııa EO elderi arasynda eń sońǵy orynda — bar bolǵany 1,8%. Sondaı-aq, Slovakııa (2,4%) men Polsha (3%) da artta qalǵan elderdiń qatarynda.

Aıta keteıik, 2018 jylǵa deıin jańa elektromobılderdiń úlesi jalpy tirkeýler ishinde 1%-dan tómen bolǵan. Degenmen keıingi jyldary bul kórsetkish turaqty túrde ósip keldi:

• 2020 jyly — 5,3%,

• 2021 jyly — 9%,

• 2022 jyly — 12,1%,

• 2023 jyly — 14,6%.

Bolashaqta bul úrdis jalǵasady ma, joq pa — ony naryqtyq jáne tehnologııalyq faktorlar anyqtaıtyn bolady, dep málimdedi Eýropalyq statıstıkalyq basqarma.

Al jalpy álemde elektromobılderdiń satylymy artyp keledi.