Eýropalyq Odaqpen 12 mıllıard dollardan asatyn kommertsııalyq kelisimderge qol qoıylady
ASTANA. KAZINFORM - Memleket basshysy Qasym-Jomart Toqaev «Qazaqstan – EO» dóńgelek ústelde osy sapar barysynda jalpy somasy 12 mıllıard dollardan asatyn kommertsııalyq kelisimderge qol qoıylatynyn jetkizdi, dep habarlaıdy Aqordanyń bapasóz qyzmeti.
Qasym-Jomart Toqaevtyń pikirinshe, bul Qazaqstan men Eýropalyq Odaq arasyndaǵy seriktestiktiń tujyrymdamalyq tásilderdi pysyqtaýdan naqty áreketke ulasqanyn ańǵartady.
Prezıdent Qazaqstannyń sońǵy jyldardaǵy ekonomıkalyq tabysy jáne atalǵan nátıjege jetkizgen júıeli ózgerister jaıynda málimet berdi.
– Qazaqstan ekonomıkasy ornyqtylyq kórsetip, jedel damyp keledi. Byltyr el ekonomıkasynyń ósimi 6,5 paıyzǵa jetti. Bul – Halyqaralyq valıýta qory boljaǵan jahandyq ósim qarqynynan eki ese joǵary. Іshki jalpy ónim kólemi 305 mıllıard dollardan asty, al jan basyna shaqqandaǵy ІJÓ 15 myń dollardy qurady. Halyqaralyq valıýta qorynyń boljamy boıynsha, bıyl ulttyq ekonomıka kólemi 360 mıllıard dollarǵa jetedi. Qazirgi ýaqytta ekonomıkamyzdyń 40 paıyzǵa jýyǵyn shaǵyn jáne orta bıznes quraıdy. Olar negizgi kapıtalǵa salynatyn ınvestıtsııanyń shamamen 70 paıyzyn qamtamasyz etip otyr. Bul jetistikterge, saıyp kelgende, keshendi ári júıeli reformalar túrtki boldy. Qazaqstanda barynsha ashyq, básekege qabiletti ári ınvestorlarǵa qolaıly ekonomıka qurý maqsatynda aýqymdy saıası jáne ekonomıkalyq jańǵyrýlar júrgizilip jatyr. Biz demokratııalyq ınstıtýttardy kúsheıtip, tejemelik ári tepe-teńdik júıesin jetildirdik, zań ústemdigin ornattyq jáne adam quqyqtaryn qorǵaý aıasyn keńeıttik. «Zań men tártip» qaǵıdatyn múltiksiz saqtaý ishki saıasatymyzdyń ózegine aınaldy. Taıaýda ótken tarıhı jalpyulttyq referendým da ınvestorlardyń quqyqtary men múddelerin qorǵaýǵa arnalǵan zamanaýı ınstıtýtsıonaldyq baza qalyptastyrýǵa septigin tıgizdi. Ulttyq tsıfrlyq ınvestıtsııalyq platforma endi ınvestorlarǵa «bir tereze» qaǵıdatyna sáıkes tolyqqandy qyzmet kórsetedi, al Investıtsııalyq keńes ınvestıtsııaǵa qatysty túıtkildi máselelerdiń tıimdi sheshilýin qamtamasyz etedi. Sonymen qatar biz jańa yntalandyrý tetikterin engize bastadyq. Mysaly, Altyn Visa baǵdarlamasy halyqaralyq ınvestorlarǵa salyq jáne kóshi-qon máselesinde edáýir jeńildikter beredi. Bir sózben aıtqanda, Qazaqstan – saıası turaqty, makroekonomıkalyq kórsetkishtkeri ornyqty, ekonomıkasy ashyq ári naryq reformalaryna beıil el. Al munyń bárin ınvestorlar erekshe baǵalaıdy, – dedi Memleket basshysy.
Osyǵan deıin EO-men ekijaqty taýar aınalymy 45 mıllıard dollardan asqany týraly jazdyq.
