Eýropalyq Odaq tarıhta alǵash ret Dıplomatııalyq akademııa qurady
ASTANA. KAZINFORM – Eýropalyq keńes eýropalyq dıplomattardy daıarlaıtyn Eýroodaq tarıhyndaǵy tuńǵysh Dıplomatııalyq akademııany qurý týraly sheshim qabyldady.
Eýropalyq Odaqtyń Dıplomatııalyq Akademııasy (EUDA) EO-nyń álemdegi róli týraly ortaq túsinikti damytý jáne ilgeriletý, dıplomatııadaǵy ozyq tájirıbeni «eýropalyq dıplomatııalyq korpýs» rýhynda taratý jáne dıplomatııalyq rýhty nyǵaıtý maqsatynda múshe memleketterdiń dıplomattary men ınstıtýttary qyzmetkerleriniń bilim alýy men daıarlanýyn qamtamasyz etedi.
Eýropalyq Keńes málimdemesinde akademııa EO-nyń qaǵıdattaryn, maqsattaryn, qundylyqtaryn, múddelerin jáne jahandyq rólin tereńirek túsinetin, Brıýsselde, EO delegatsııalarynda nemese ózderiniń ulttyq qurylymdarynda EO máselelerin sheshýde jáne onyń strategııalyq mindetterin sheshýde tıimdi jumys isteı alatyn «eýropalyq dıplomattardyń synı tobyn qurýǵa» úles qosatyny aıtylǵan.
Bilim berý 2024-2025 jáne 2027-2028 jyldar aralyǵyndaǵy tórt oqý jylyn qamtıtyn EO-nyń syrtqy qyzmetinde bilim berý jáne oqytýda kóp jyldyq tájirıbesi bar ataqty ınstıtýt Eýropa kolledjimen seriktestikte júzege asyrylady.
EUDA syrtqy ister jáne qaýipsizdik saıasaty jónindegi Joǵarǵy ókildiń basshylyǵymen jumys isteıtin bolady. Ony árbir múshe memleket taǵaıyndaıtyn bir ókilden, sondaı-aq Eýropalyq Parlamenttiń, Keńes pen Komıssııanyń ókilderinen turatyn Basqarý komıteti basqarady.
2024 jylǵy 1 shildeden 2025 jylǵy 30 maýsymǵa deıingi kezeńge arnalǵan oqý baǵdarlamasynyń shyǵyndaryn jabýǵa arnalǵan negizgi qarjylyq soma 1,7 mln eýrodan sál asady.
