Eýropalyq Odaq taǵy 6 jasandy ıntellekt zaýytyn salady

ASTANA. KAZINFORM —  Zaýyttar Chehııada, Lıtvada, Nıderlandyda, Polshada, Rýmynııada jáne Ispanııada salynady, dep jazdy Anadoly.

Eýropalyq Odaqtyń Eýropalyq joǵary ónimdi esepteýler (EuroHPC) seriktestik bastamasyna sáıkes Chehııada, Lıtvada, Nıderlandyda, Polshada, Rýmynııada jáne Ispanııada «AI zaýyttary» dep atalatyn jańa ortalyqtar qurylady.

Lıýksembýrgte ornalasqan EuroHPC Eýropada sýperkompıýterlik tehnologııalar men qosymshalardy damytýǵa baǵyttalǵan jańa ortalyqtardy ornalastyrý josparyn jarııalady.

Habarlandyrýda EuroHPC qosymsha jasandy ıntellekt nysandaryn ornalastyrý úshin joǵaryda atalǵan 6 eldi tańdaǵany atap ótildi.

— Eýropada mundaı ortalyqtar úshin 13 oryn anyqtaldy. Olar birigip kontınentte tehnologııalyq sheshimderdi ázirleýdi jeńildetetin ózara baılanysy bar jasandy ıntellekt ınnovatsııalyq ortalyqtarynyń jelisin qurýǵa arnalǵan, — delingen habarlamada.

Sondaı-aq bul 6 el jasandy ıntellekt salasyndaǵy Eýropanyń áleýetin odan ári keńeıtetin AI ońtaılandyrylǵan esepteý júıeleri men qosymsha ınfraqurylymdy jasaıtyny belgili boldy.

Habarlandyrýda «AI zaýyttary» eýropalyq AI startaptaryna, shaǵyn jáne orta kásiporyndarǵa jáne zertteýshilerge keshendi qyzmetter usynatyn ulttyq qoljetimdi ortalyqtaryn usynatyny aıtylǵan.

Alty zaýyt EO men múshe memleketterden 500 mıllıon eýrodan astam qarjy alady. Bul qadam Eýropanyń esepteý qýatyn arttyrýǵa jáne ekonomıkanyń negizgi sektorlarynda jasandy ıntellektini engizýdi jedeldetýge arnalǵan.

Aıta keteıik, Qytaıda jasandy ıntellektpen aınalysatyn 5 300-den astam kompanııa bar.