Eýropalyq Odaq soty Google-ǵa salynǵan 4,1 mlrd eýro aıyppuldy kúshinde qaldyrdy
ASTANA. KAZINFORM — Quramyna Google kompanııasy kiretin amerıkalyq Alphabet korporatsııasy Eýropalyq Odaqtyń monopolııaǵa qarsy organyna qarsy sot daýyn túpkilikti túrde jeńilispen aıaqtady, dep habarlaıdy Kazinform agenttiginiń EO-daǵy menshikti tilshisi.
Eýropanyń eń joǵary sot organy kompanııaǵa salynǵan rekordtyq 4,1 mıllıard eýro kólemindegi aıyppuldyń zańdy ekenin rastady.
Segiz jylǵa sozylǵan sot protsesi Lıýksembýrgte ornalasqan Eýropalyq Odaq Sotynyń (CJEU) sheshimimen aıaqtaldy. Joǵary sot ınstantsııasy tehnologııalyq alpaýyttyń apellıatsııalyq shaǵymyn qanaǵattandyrmaı, Eýropalyq komıssııanyń Google-dyń mobıldi operatsııalyq júıeler naryǵyndaǵy ústem jaǵdaıyn teris paıdalanǵany týraly qorytyndysyn zańdy dep tanydy.
Bastapqyda Eýropalyq komıssııa 2018 jyly Google-ǵa budan da joǵary — 4,34 mıllıard eýro kóleminde aıyppul salǵan bolatyn. Retteýshi organ kompanııa Android operatsııalyq júıesiniń keń taralýyn básekelesterdiń naryqqa shyǵýyna kedergi jasaý úshin paıdalanǵanyn anyqtady.
Atap aıtqanda, Google smartfon óndirýshilerine:
-
Google Play qoldanbalar dúkenine lıtsenzııa alý úshin Google Search izdeý júıesi men Chrome braýzerin qurylǵylarǵa mindetti túrde aldyn ala ornatýdy talap etken;
-
sondaı-aq Android-tiń balama nusqalarymen jumys isteıtin qurylǵylardy satýdan bas tartýdy mindettegen.
2022 jyly birinshi satydaǵy sot aıyppul kólemin azdap qysqartyp, 4,1 mıllıard eýroǵa deıin tómendetti. Sonymen birge taǵylǵan aıyptardyń basym bóligin negizdi dep tanydy. Al joǵary sottyń búgingi sheshimi bul iske túpkilikti núkte qoıdy.
— Google jáne onyń bas kompanııasy Alphabet Bas sottyń sheshimine qarsy bergen apellıatsııalyq shaǵym qanaǵattandyrylmady. Osylaısha, Android operatsııalyq júıesi aıasynda Google Search qyzmeti arqyly ústem jaǵdaıyn teris paıdalanǵany úshin salynǵan aıyppul tolyq kólemde zańdy dep tanyldy, — delingen sýdıalardyń resmı málimdemesinde.
Google kompanııasynyń ókilderi ózderiniń resmı málimdemesinde sot sheshimine kóńilderi tolmaıtynyn bildirdi. Kompanııanyń aıtýynsha, bul úkim Android-ti barshaǵa qoljetimdi, úılesimdi jáne tegin ashyq operatsııalyq júıe retinde damytýǵa salynǵan mıllıardtaǵan ınvestıtsııany eskermeıdi.
— Qalaı bolǵanda da, biz 2018 jyldyń ózinde-aq Eýropalyq komıssııanyń bastapqy sheshimine sáıkes bolý úshin kelisimderimizge ózgerister engizdik. Biz paıdalanýshylarymyz, seriktesterimiz jáne ázirleýshilerimiz úshin ınnovatsııalar engizý men ashyqtyq qaǵıdatyn saqtaýǵa basymdyq berýdi jalǵastyramyz, — dep málimdedi Google.
Sarapshylardyń pikirinshe, aldaǵy ýaqytta Big Tech sektoryndaǵy iri tehnologııalyq kompanııalar jańa sanktsııalarǵa tap bolýy múmkin. Qazirgi kezde olardyń qyzmeti kúshine engen Eýropalyq tsıfrlyq naryqtar týraly zańmen (Digital Markets Act, DMA) qatań retteledi. Bul zań ІT-alyptarynyń qyzmet kórsetý barysynda ádiletsiz básekelestikke jol berýiniń aldyn alýǵa baǵyttalǵan.
Osyǵan deıin Google-dy aıyptaǵan násildik kemsitýshilik isi 50 mln dollarmen jabylǵanyn jazǵanbyz.
