Eýropalyq odaq pen Pákistan baılanystaryn nyǵaıtyp jatyr
ASTANA. KAZINFORM — Eýropalyq odaqtyń syrtqy ister jáne qaýipsizdik saıasaty jónindegi joǵary ókili Kaıa Kallas Pákistanǵa resmı saparmen bardy, dep habarlaıdy Kazinform agenttiginiń EO-daǵy menshikti tilshisi.
Sheteldik buqaralyq aqparat quraldarynyń habarlaýynsha, Pákistan Eýropalyq odaqpen saýda, ınvestıtsııa, ınstıtýtsıonaldyq baılanystar jáne salalyq yntymaqtastyqty nyǵaıtýǵa umtylyp otyr. Bul týraly dúısenbi kúni Pákistan Premer-mınıstriniń orynbasary Ishaq Dar Kaıa Kallaspen ótken kelissózder barysynda málimdedi.
EO men Pákistan dıplomattary EO–Pákistan strategııalyq dıalogynyń 8-sessııasyna birlesip tóraǵalyq etip otyr.
Jýrnalıster aldynda ótken birlesken baspasóz máslıhatynda Ishaq Dar eki taraptyń saýda jáne ınvestıtsııalardy qosa alǵanda, birqatar baǵyt boıynsha yntymaqtasa alatynyn aıtty.
— Biz bul baǵdarlamalyq qujat saıası ózara túsinistikti tereńdetýge, salalyq yntymaqtastyqty keńeıtýge jáne Pákistan men Eýropalyq odaq arasyndaǵy ınstıtýtsıonaldyq baılanystardy nyǵaıtýǵa mańyzdy negiz bola alady dep esepteımiz, — dedi ol.
Onyń aıtýynsha, strategııalyq dıalogtyń jalǵasýy Pákistan men EO arasyndaǵy qarym-qatynasqa jańa serpin berýge jáne bolashaqqa baǵdarlanǵan áriptestikti qalyptastyrýǵa degen ortaq umtylysty kórsetedi.
Kaıa Kallas Pákistannyń AQSh pen Iran arasyndaǵy kelissózderge járdemdesýin joǵary baǵalap, bul qaqtyǵys álemniń kóptegen eline áser etip, energııa tasymaldaýshylar men tyńaıtqyshtardyń qymbattaýyna alyp keletinin atap ótti. Sondaı-aq ol Pákistan men EO óńirlik turaqtylyqty qamtamasyz etý baǵytynda birlesip jumys istep jatqanyn aıtty.
— Osy turǵyda Eýropalyq odaq pen Pákistan arasyndaǵy saýda qatynastarynyń qarqyndy damýyn shyn júrekten quptaımyn, — dedi Kaıa Kallas.
Ol Eýropa Pákistan eksporty úshin eń iri naryq bolyp qala beretinin atap ótti.
Sonymen qatar, Pákistannyń áli de GSP Plus baǵdarlamasynyń negizgi benefıtsıarlarynyń biri ekenin aıtty. Onyń sózinshe, bul áriptestiktiń tek kommertsııalyq mańyzǵa ǵana emes, sonymen birge ekonomıkalyq ósýdiń qozǵaýshy kúshine aınalǵanyn kórsetedi.
GSP Plus baǵdarlamasy adam quqyqtary men azamattyq quqyqtardy qamtıtyn 27 negizgi halyqaralyq konventsııany oryndaýǵa erikti túrde kelisken elderdiń eksportyna Eýropa naryǵyna baj salyǵynsyz qol jetkizý múmkindigin beredi.
— Saýda men ınvestıtsııalardan bólek, baılanystarymyzdy tereńdete alatyn basqa da baǵyttar bar. Mysaly, turaqtylyqty arttyrý, klımat, tsıfrlyq ınfraqurylym jáne kóshi-qon máseleleri. Munyń bári uzaq merzimdi áriptestikke salynǵan ınvestıtsııa, — dedi Kaıa Kallas.
