Eýropalyq odaq pen Kanada Monrealda sammıt ótkizip jatyr
ASTANA. KAZINFORM — 29 qazanda Kanadanyń Monreal qalasynda Eýropalyq odaq pen Kanada arasyndaǵy 21-shi sammıt bastalady. Eki kúnge josparlanǵan kezdesýdi Kazinform agenttiginiń Brıýsseldegi menshikti tilshisi habarlady.
Kezdesýdi Kanada Premer-mınıstri Mark Karnı qabyldap otyr. Eýropalyq odaq atynan Eýropalyq keńestiń tóraǵasy Antonıý Koshta, Eýropalyq komıssııanyń tóraǵasy Ýrsýla fon der Lıaıen jáne Eýropalyq odaqtyń syrtqy ister jáne qaýipsizdik saıasaty jónindegi joǵary ókili Kaıa Kallas qatysýda. Sammıt jumysyna saýda, qorǵanys jáne jastar saıasatyna jaýapty ókilderdi qosa alǵanda, birqatar eýrokomıssar da qatysady.
Sammıt qorytyndysy boıynsha taraptar saıası, ekonomıkalyq jáne ınstıtýtsıonaldyq yntymaqtastyqty tereńdetýge, saýda qaýipsizdigin nyǵaıtýǵa jáne halyqaralyq arenadaǵy is-qımyldardy úılestirýge baǵyttalǵan «Bolashaq alıansy» atty negizdemelik bastamanyń iske qosylǵanyn jarııalaýdy josparlap otyr.
Kún tártibine saýda jáne tsıfrlyq saýda, asa mańyzdy shıkizat pen jetkizý tizbekteri, qorǵanys jáne qaýipsizdik, energetıka, sondaı-aq bilim berý, ǵylymı zertteýler, ınnovatsııalar jáne jastar almasýy salalaryndaǵy yntymaqtastyq máseleleri engizilgen.
Sammıt 2025 jylǵy maýsymda Brıýsselde ótken kóshbasshylar kezdesýinen keıin ekijaqty qatynastardyń tereńdeýi aıasynda ótip jatyr. Sol kezde Eýropalyq odaq pen Kanada arasyndaǵy bolashaqqa arnalǵan jańa strategııalyq áriptestik qabyldanyp, qaýipsizdik jáne qorǵanys salasyndaǵy áriptestik týraly kelisimge qol qoıylǵan edi. Sodan beri Kanada Eýropalyq odaqtyń SAFE bastamasyna qosylǵan alǵashqy eýropalyq emes el atandy.
Buǵan deıin eýropalyq buqaralyq aqparat quraldarynda sammıttiń qorytyndy deklaratsııasyna Kanadaǵa Eýropalyq odaqtyń «qaýymdastyrylǵan múshesi» mártebesin berý týraly usynys engizilmegeni habarlanǵan bolatyn. Onyń ornyna taraptar odan ári jaqyndasýǵa baǵyttalǵan «ever closer association» («yntymaqtastyqty odan ári tereńdetý») degen tujyrymdy qoldanady.
Eýropalyq odaq – Kanadanyń saýda kólemi boıynsha ekinshi iri seriktesi. 2025 jyly taraptar arasyndaǵy taýarlar men qyzmetter saýdasynyń kólemi 130 mıllıard eýrodan asty.
