Eýropalyq Odaq pen Iordanııa seriktestik qujatyna qol qoıdy
ASTANA. KAZINFORM – Iordanııa Koroli II Abdalla Brıýsselde bolyp, onda Eýroodaq pen Iordanııa strategııalyq jáne jan-jaqty áriptestik týraly qujatqa qol qoıdy, dep habarlaıdy Kazinform menshikti tilshisi.
- Eýrpalyq Odaq pen Iordanııa osy seriktestiktiń arqasynda eki tarapqa da ortaq qaýiptermen kúresti múmkindiginshe tıimdi júrgizý jáne beıbitshilik, demokratııa men adam quqyqtary sııaqty ortaq qundylyqtardy damytý úshin ejelden qalyptasqan qarym-uatynas pen dostyqty tereńdete túsýde - delingen Eýropalyq komıssııa tóraıymy Ý.Lıaıenniń málimdemesinde.
Eýropalyq baǵalaýǵa sáıkes, Iordanııa – Eýropanyń Taıaý Shyǵys pen Jerorta teńizindegi negizgi seriktesi jáne aımaqtyq turaqtylyqtyń tiregi retinde qyzmet etedi.
- El mıllıondaǵan bosqyndardy qabyldaýda keremet jomarttyq tanytty jáne aımaqta jáne búkil álemde beıbitshilik pen qaýipsizdikti saqtaýǵa tolyǵymen daıyn, - delingen qujatta.
Iordanııa Gazadaǵy atysty toqtatý rejımin saqtaýda sheshýshi ról atqarady, al EO onyń gýmanıtarlyq kómektiń aımaqtyq ortalyǵy retinde mańyzdylyǵyn moıyndaıdy. Sırııadaǵy ótpeli kezeńdi qoldaýdaǵy Iordanııanyń kóshbasshylyǵy onyń óńirdiń bolashaǵyn qalyptastyrýdaǵy sheshýshi rólin aıqyndap otyr.
Strategııalyq jáne jan-jaqty seriktestik úsh negizgi maqsatqa baǵyttalǵan: Iordanııanyń turaqtylyǵyn qoldaý, korol Abdalla II-niń saıası, ekonomıkalyq jáne ákimshilik modernızatsııa kún tártibin ilgeriletý, sondaı-aq eldiń ekonomıkalyq turaqtylyǵyn nyǵaıtý.
Búginde EO qazirgi geosaıası syn-qaterlerdi eńserýde, qoǵamdaǵy ósý men damýǵa yqpal etetin reformalardy júzege asyrýda jáne ekonomıkasyn nyǵaıtý úshin ınvestıtsııa tartýda Iordanııaǵa qoldaý kórsetýge óziniń adaldyǵyn rastaıdy.
Bul seriktestik 2025-2027 jyldarǵa arnalǵan 3 mlrd eýro kólemindegi qarjylyq jáne ınvestıtsııalyq paketpen qoldaý tapty. Bul Taıaý Shyǵystaǵy qıyndyqtardyń ózektiligi men aýqymyn kórsetetin aıtarlyqtaı ósim.
Bul seriktestik aıasynda EO men Iordanııa saıası qarym-qatynastar men aımaqtyq yntymaqtastyq, qaýipsizdik pen qorǵanys, ekonomıkalyq turaqtylyq, saýda jáne ınvestıtsııa, bilim men biliktilikti arttyrý, kóshi-qon máseleleri jáne bosqyndardy qoldaý sııaqty keń aýqymdy salalarda yntymaqtasady.
- Búgin meniń Korol II Abdallaǵa jáne Iordanııa halqyna joldaýym mynaý: Eýropa seriktestikti qatty baǵalaıdy. Sizdiń batyldyǵyńyz ben aımaqtyq turaqtylyqqa degen adaldyǵyńyz moıyndaýǵa laıyq. Eýropa árqashan sizben birge bolady - synaqtarda da, sáttilikterde de, - delingen Ý.Lıaıen málimdemesinde.
Buǵan deıin 16 jeltoqsanda Eýrokomıssııa tóraıymy Ýrsýla fon der Lıaıen Iordanııaǵa baryp, Iordanııa koroli Abdalla II-men kezdesti.
Osyǵan deıin Iran men Eýropalyq Odaqtyń úsh eli sanktsııalardy joıý týraly kelissóz bastaǵanyn jazǵan bolatynbyz.