Eýropalyq odaq Meksıkamen saýda baılanysyn keńeıtedi
ASTANA. KAZINFORM — Mehıko qalasynda Eýropalyq Odaq pen Meksıka arasyndaǵy segizinshi sammıt ótti, dep habarlaıdy Kazinform agenttiginiń Brıýsseldegi menshikti tilshisi.
Bul eki taraptyń sońǵy 11 jyldaǵy eń joǵary deńgeıdegi alǵashqy kezdesýi boldy. Sammıtke Eýropalyq keńestiń tóraǵasy Antonıý Koshta, Eýropalyq komıssııanyń tóraıymy Ýrsýla fon der Lıaıen jáne Meksıka prezıdenti Klaýdııa Sheınbaým qatysty.
Negizgi nátıje retinde eki qujatqa qol qoıyldy: Modernised Global Agreement (MGA) — saıası, ekonomıkalyq jáne yntymaqtastyq salalaryndaǵy strategııalyq seriktestik jónindegi jańartylǵan Globaldyq kelisim, jáne Interim Agreement on Trade (ITA) — saýda boıynsha aralyq kelisim.
Bul kelisimder 2000 jylǵy kelisimderdi jańartýǵa jáne ekijaqty qarym-qatynasty jańa deńgeıge kóterýge arnalǵan. Saýda-ekonomıkalyq yntymaqtastyq aıtarlyqtaı keńeıedi dep josparlanǵan. Tarıfterdiń tolyq joıylýy, tarıftik emes kedergilerdiń joıylýy, memlekettik satyp alý jáne qyzmet naryqtarynyń ashylýy, sondaı-aq zııatkerlik menshik pen geografııalyq kórsetkishterdiń qorǵalýyn kúsheıtý kózdelgen.
Eýrostat málimeti boıynsha 2025 jyly EO men Meksıka arasyndaǵy taýar aınalymy 86 mıllıard eýrodan asty. Meksıka Latyn Amerıkasynda EO-nyń saýda seriktesteri arasynda úshinshi oryn alady.
Sammıt barysynda taraptar klımattyń ózgerýi men turaqty damý, qaýipsizdikti kúsheıtý jáne uıymdasqan qylmysqa qarsy is-qımyl, mıgratsııa, tsıfrlandyrý men ınnovatsııalar, geosaıası qaýipter jáne jetkizý tizbekterin ártaraptandyrý máselelerin talqylady.
Kóshbasshylar halyqaralyq jaǵdaı ózgerip otyrǵan kezde strategııalyq seriktestikti nyǵaıtý mańyzdy ekenin atap ótti. Kelisimderge qol qoıý Eýropa men Latyn Amerıkasy arasyndaǵy saýda-ekonomıkalyq baılanystardy damytý men kóppolıarly álemdi nyǵaıtýǵa mańyzdy qadam retinde qarastyrylyp otyr.
Eske sala keteıik, buǵan deıin Eýropalyq odaq elderi AQSh-pen jasalǵan saýda kelisimin ózara bekite almady.
