Eýropalyq Odaq qorǵanys tehnologııalaryn damytýǵa 115 mln eýro bólmek
ASTANA. KAZINFORM – Eýropalyq Odaq ınnovatsııalyq qorǵanys tehnologııalaryn ázirleýdi jedeldetý úshin 115 mln eýro bólýdi josparlap otyr. Agile dep atalatyn jańa qarjylandyrý baǵdarlamasyn 25 naýryz, sársenbi kúni Brıýsselde EO-nyń qorǵanys jónindegi komıssary Andrıýs Kýbılıýs tanystyrdy, dep jazdy DW.com.
Onyń aıtýynsha, qazirgi tańda soǵys júrgizý tásilderi túbegeıli ózgeristerge ushyrap jatyr. Sondyqtan qarýly kúshterge qarsylastardan «aqyldyraq ári jyldamyraq» bolý úshin jańa tehnologııalar, jedel jetkizilim jáne básekege qabiletti baǵalar qajet.
– Biz keshegi emes, erteńgi soǵystarda jeńiske jetýge daıyn bolýymyz kerek, — dedi Kýbılıýs.
Baǵdarlama aıasynda jasandy ıntellekt, kvanttyq tehnologııalar jáne ushqyshsyz ushý apparattary sııaqty baǵyttarǵa erekshe nazar aýdarylady. EO-nyń tehnologııalar jónindegi komıssary Henna Vırkkýnenniń sózinshe, Agile baǵdarlamasy Eýropadaǵy eń kreatıvti tehnologııalyq kompanııalardy qorǵanys ónerkásibimen jaqyndastyrýdy kózdeıdi. Bul bastama qorǵanys salasyndaǵy ınnovatsııalardy ázirleýdi, synaqtan ótkizýdi jáne naryqqa shyǵarýdy jedeldetýge baǵyttalǵan.
Pılottyq kezeńde 20–30 joba qarjylandyrylyp, árqaısysyna 1 mln-nan 5 mln eýroǵa deıin bólinedi. Negizgi basymdyq EO elderi, Eýropalyq erkin saýda qaýymdastyǵy jáne Ýkraınadan shyqqan shaǵyn jáne orta bıznes pen startaptarǵa beriledi.
Jobalardy maquldaý merzimi barynsha qysqartylyp, nebári 4 aıdy quramaq. Al jańa tehnologııalardy qarýly kúshterge engizý 1–3 jyl ishinde júzege asyrylady dep josparlanǵan.
Baǵdarlama EO bıýdjeti esebinen qarjylandyrylady. Eýrokomıssııanyń bul usynysy EO Keńesi men Eýroparlament tarapynan maquldanýy tıis. Baǵdarlamany iske qosý 2027 jyldyń basyna josparlanyp otyr.
Eske sala ketsek, osy aıda Eýroodaqtyń alty iri eli qarjy naryǵyn ıntegratsııalaýdy jedeldetýdi usyndy.
Al Eýrokomıssııa basshysy Eýropada atom energetıkasyn qysqartý úlken qatelik bolǵanyn málimdedi.
