Eýropalyq Odaq Izraıldegi ólim jazasy týraly zańǵa alańdaýshylyq bildirdi
ASTANA. KAZINFORM — Eýropalyq Odaq (EO) Izraıl parlamenti – Knessette palestınalyq tutqyndarǵa baǵyttalǵan «ólim jazasy» týraly daý týǵyzǵan zańnyń qabyldanýyna «qatty alańdaýly». Bul týraly Anadoly agenttigi jazdy.
Bul týraly syrtqy saıasat boıynsha EO resmı ókili Anýar Al-Anýnı «Anadolý» agenttiginiń tilshisiniń suraǵyna jaýap berý barysynda aıtty. Suraq zań qabyldanǵannan keıin EO Izraılmen seriktestik kelisimin ýaqytsha toqtata ma degen máselege qatysty boldy.
Al-Anýnı bul bastamany «adam quqyqtaryn saqtaý mindettemelerine keri qadam» dep baǵalady.
— Zań qabyldanǵannan keıin Izraılde túrli pikirler aıtyldy, sondaı-aq Joǵarǵy sotqa apellıatsııa berildi, — dedi ol.
EO ókiliniń aıtýynsha, Brıýssel qandaı jaǵdaıda bolsa da ólim jazasyna qarsy bolyp otyr, sebebi bul ómir súrý quqyǵyn buzady jáne odaqtyń negizgi qundylyqtaryna qaıshy keledi.
Al-Anýnı Izraıldi buryn «ólim jazasyna qatysty aımaqtaǵy úlgili el» dep ekenin atap ótti jáne «zańnyń qabyldanýy Izraıl buryn ustanǵan mańyzdy tájirıbeden aıtarlyqtaı keri qadam bolyp tabylady» dedi.
Ol Izraıldi óz «burynǵy prıntsıptik ustanymyna» jáne halyqaralyq quqyq pen demokratııalyq qaǵıdattarǵa adal bolýǵa shaqyrdy. Sonymen qatar, EO ókilderi Izraıldegi áriptesterimen baılanysta ekenin aıtty.
Eske sala keteıik, buǵan deıin Izraıl parlamenti palestınalyqtardy ólim jazasyna taǵaıyndaıtyn zań jobasyn maquldaǵanyn jazdyq.
