Eýropalyq Odaq elderinde jumyrtqa baǵasy ósti

ASTANA. KAZINFORM – Eýropalyq Odaqqa múshe elderde jumyrtqanyń baǵasy kóterildi, dep habarlaıdy Kazinform Euronews arnasyna silteme jasap.

Eýrostat statıstıkalyq agenttiginiń derekteri boıynsha, 2025 jyldyń naýryz aıynda EO-da jumyrtqanyń baǵasy 2024 jyldyń naýryz aıymen salystyrǵanda orta eseppen 6,7%-ǵa joǵary bolǵan. Jyldyq eseppen alǵanda Chehııada bul ónimniń baǵasynyń ósýi 46%-dan asyp otyr. Bul – EO-daǵy eń joǵary kórsetkish. 

Chehııadan keıin bul tizimde Slovakııa tur. Bul elde atalǵan ónimniń baǵasy 30%-ǵa, al Majarstanda 26%-ǵa qymbattaǵan. Kerisinshe, jumyrtqa baǵasy Nıderlandyda 3,6%-ǵa, Lıýksembýrgte 3,2%-ǵa jáne Grekııada 2,0%-ǵa arzandaǵan. 

Jumyrtqa baǵasy 2025 jyldyń basynan beri kóterilip keledi. 2024 jyldyń sáıkes kezeńimen salystyrǵanda qańtarda baǵa 3,4%-ǵa, aqpanda 4,1%-ǵa ósti. 

2024 jyly 12 aıdyń 10-ynda 2023 jylmen salystyrǵanda baǵa ózgerisiniń teris qarqyny baıqaldy. Alaıda bul baǵanyń ósýi 2022 jáne 2023 jyldarmen salystyrǵanda az boldy. Sodan keıin barlyq aıda – 2022 jyldyń sáýirinen 2023 jyldyń qyrkúıegine deıin baǵanyń eki tańbaly ósimi baıqaldy. 2023 jyldyń aqpan aıynda jumyrtqa baǵasynyń ósimi 2022 jyldyń sáıkes aıymen salystyrǵanda 31,2%-ǵa kóterilgen. 

Eske sala keteıik, buǵan deıin elimizde jumyrtqa baǵasy arzandaǵanyn jazǵan edik.