Eýropalyq Odaq AITV-ǵa qarsy jańa vaktsınany qoldanýǵa ruqsat berdi
ASTANA. KAZINFORM — EO «Lenakapavır» vaktsınasyn Adam ımmýn tapshylyǵy vırýsynan (AITV) qorǵaný úshin qoldanýǵa ruqsat etti, dep habarlaıdy DW.
AFP agenttiginiń málimetinshe, AITV-dan qorǵanýǵa arnalǵan «Lenakapavır» preparaty Eýropalyq dári-dármekter agenttigi (EMA) tarapynan jedeldetilgen tártippen qaralyp, Eýroodaqta maquldandy.
Zertteýler kórsetkendeı, Eýropada Yeytuo, al AQSh-ta Yeztugo ataýymen satylatyn «Lenakapavır» eresekter men jasóspirimder arasynda AITV juqtyrý qaýpin 99,9%-dan astam tómendetedi. Preparatty qoldanar aldynda patsıent eki bastapqy tabletkany qabyldaıdy, sodan keıin dári teri astyna ár alty aı saıyn egiledi.
Eýropalyq dári-dármekter agenttigi bul baǵalaýdy Eýroodaq elderine ǵana emes, sondaı-aq eýroaımaqqa kirmeıtin memleketter úshin de EMA Medicines for All baǵdarlamasy aıasynda júrgizdi. Bul protseske Dúnıejúzilik densaýlyq saqtaý uıymy (DDU) men Kenııa, Nıgerııa jáne Taılandty qosa alǵanda segiz eldiń retteýshi organdary da qatysty.
Aıta keteıik, AITV-dan qorǵaıtyn aldyn alý preparattary on jyldan astam ýaqyttan beri qoldanysta bolǵanymen, olardyń jahandyq indettiń taralýyna aıtarlyqtaı áseri áli baıqalmaı otyr. DDU derekteri boıynsha, 2024 jyly álem boıynsha 1,3 mıllıon adam AITV juqtyrǵan, onyń ishinde 160 myńy Eýropada, al 650 myńy Afrıkada tirkelgen.
Buǵan deıin AQSh álemdegi alǵashqy AITV-ge qarsy vaktsınany maquldaǵanyn jazǵanbyz.