Eýropalyq odaq 2030 jylǵa deıin jańa músheler qabyldaýy múmkin — Kaıa Kallas

ASTANA. KAZINFORM — Eýropalyq odaqtyń syrtqy ister jáne qaýipsizdik saıasaty jónindegi joǵarǵy ókili Kaıa Kallas seısenbi kúni 2030 jylǵa deıin EO-ǵa jańa memleketterdi qabyldaý «realıstik maqsat» ekenin málimdedi, dep habarlaıdy Kazinform tilshisi.

— Eger biz álemdik arenada myqty oıynshy bolǵymyz kelse, Eýropalyq odaqtyń keńeıgeni abzal. Bul — bizdiń ortaq múddemizge saı jáne qaýipsizdik, turaqtylyq pen ekonomıkalyq damý turǵysynan uzaq merzimdi ınvestıtsııa, — dedi Kaıa Kallas EO-nyń keńeıý týraly esebine arnalǵan baspasóz máslıhatynda.

Sonymen qatar ol jańa elderdi qabyldaý protsesi «ádil, qatań jáne naqty jetistikterge negizdeletinin» atap ótti.

Kallas atap ótkendeı, EO quramyna enýge ótinish bergen elderdiń baǵalaý nátıjeleri Chernogorııa, Albanııa, Ýkraına jáne Moldova úshin «negizinen oń» bolǵan. Al Serbııa, Bosnııa jáne Gertsegovına, Kosovo, Túrkııa men Soltústik Makedonııanyń múmkindikteri áli de belgisiz. Al Grýzııanyń jaǵdaıy — «kóńil kónshitpeıdi».

Eske sala keteıik, buǵan deıin Eýropalyq komıssııa Eýropalyq Odaqtyń Qytaıǵa táýeldiligin azaıtý maqsatynda sırek jer metaldary men ózge de strategııalyq mańyzdy materıaldardy ımporttaý boıynsha jańa strategııa ázirlep jatqanyn jazǵan edik.