Eýropalyq logıstıka kompanııasy Qazaqstanmen tize qosyp jumys isteýge daıyn

ASTANA. KAZINFORM — Qazaqstan Premer-Mınıstri Oljas Bektenov Rhenus Group kompanııalar tobynyń basqarma tóraǵasy Tobıas Barttspen kólik-logıstıka salasyndaǵy yntymaqtastyq máseleleri boıynsha kezdesý ótkizdi. 

Qoımalaý ınfraqurylymyn jańǵyrtý jáne temirjol tasymalyn damytý arqyly Qazaqstannyń tranzıttik qýatyn arttyrýǵa baǵyttalǵan jobalar qaralyp, jańadan qazaq-nemis kásiporyndaryn qurý perspektıvalary talqylandy.

Aıta keteıik, Rhenus Group álemdegi eń iri 25 logıstıkalyq kompanııanyń qataryna kiredi jáne Eýropada 70 termınal jelisine ıelik etedi, onyń 22-i konteıner túrinde.

Tobıas Bartts Qazaqstannyń jahandyq logıstıkadaǵy nyǵaıyp kele jatqan rólin atap ótti jáne termınaldyq qýatty ulǵaıtý úshin qazaqstandyq kompanııalardy tarta otyryp, jańa aýmaqtar qurýǵa qyzyǵýshylyǵyn bildirdi. 

Bul Eýropanyń jetkizý tizbegin Ortalyq Azııamen baılanystyrýǵa múmkindik beredi.

Oljas Bektenov kólik-logıstıkalyq jáne tranzıttik áleýetti tolyq ashý úshin ınvestorlarmen ashyq jumys isteýge daıyn ekenin aıtty.

Qazaqstan aýmaǵy arqyly iri transqurlyqtyq kólik dálizderi — Eýropadan Qytaıǵa jáne Ońtústik-Shyǵys Azııaǵa deıingi eń qysqa joldar ótedi.

Qazaqstan Ázerbaıjanmen jáne Grýzııamen Transkaspıı halyqaralyq kólik baǵyty arqyly taýarlardy ótkizý ýaqytyn qysqartý boıynsha belsendi jumys istep jatyr.

Bir jyl ishinde orta dáliz arqyly ótýdiń jalpy ýaqyty 2 ese qysqardy. 

«Qazaqstan Úkimeti eldiń kólik-logıstıkalyq áleýetin barynsha ashýǵa nıetti. Biz birlesken ınvestıtsııalyq jobalardy iske asyrý úshin yntymaqtastyqqa daıynbyz. Óz tarapymyzdan bızneske qolaıly jaǵdaı jasaı otyryp, turaqty jáne boljamdy ınvestıtsııalyq ahýalǵa kepildik beremiz», — dep atap ótti Oljas Bektenov.