Eýropalyq komıssııanyń ushý qaýipsizdiginiń qara tizimindegi barlyq shekteýler Qazaqstannan alyndy
ASTANA. KAZINFORM – Aǵymdaǵy jyldyń 15 mamyrynda Eýropalyq Odaqtyń 27 eliniń avıatsııalyq bılik ókilderiniń qatysýymen Eýropalyq komıssııanyń Ushý qaýipsizdigi komıtetiniń otyrysy ótti.
Komıtet otyrysy barysynda QR Kólik vıtse-mınıstri Talǵat Lastaev bastaǵan Qazaqstannyń avıatsııalyq bılik delegatsııasy eldegi ushý qaýipsizdigi jónindegi isterdiń aǵymdaǵy jaı-kúıi týraly tyńdady.
Qazaqstan Respýblıkasynyń Belgııadaǵy Elshiliginiń qoldaýymen komıtet otyrysy barysynda qazaqstandyq delegatsııa buryn nyqtalǵan eskertýlerdi joıý boıynsha qoldanylǵan sharalardy usyndy, olardy Eýropalyq komıssııa oń baǵalady.
EO-ǵa múshe 27 memleket qabyldaǵan komıtet otyrysynyń sheshimine sáıkes, ushý qaýipsizdigin qamtamasyz etýdegi eleýli progresti eskere otyryp, Qazaqstan men qazaqstandyq tasymaldaýshylardan Eýropalyq Odaq elderine ushýǵa qoıylǵan barlyq shekteýler alynyp tastaldy.
2024 jylǵy 30 mamyrdaǵy hatynda EK-niń utqyrlyq jáne kólik jónindegi bas dırektoratynyń avıatsııa departamentiniń dırektory Fılıp Kornelıs «Eýropalyq komıssııa Qazaqstan qyzmetiniń kúsheıtilgen monıtorıngin toqtatý týraly sheshim qabyldady» dep atap ótti.
Komıtettiń bul otyrysynyń aldynda 2009 jyldan beri júrgizilgen kóptegen jumystar, sondaı-aq EO sarapshylarymen 2024 jylǵy aqpanda sátti júzege asyrylǵan Qazaqstannyń avıatsııalyq bıliginiń ushý qaýipsizdigi júıesiniń jumysyna tehnıkalyq baǵalaý júrgizildi.
Aıta ketsek, 2022 jyly otandyq áýe kompanııalarynyń Eýropalyq komıssııanyń qara tizimine ený qaýpi joǵary boldy.
Jalpy, EO sarapshylary ushýdy paıdalaný salasyndaǵy sertıfıkattaý, baqylaý jáne qadaǵalaý júıesiniń tıimdi jumys isteýi, ushý jaramdylyǵyn qoldaý, avıatsııa qyzmmetkerlerin oqytý jáne lıtsenzııalaý boıynsha eleýli jaqsartýlardy atap ótti.
Eýropalyq komıssııanyń 2021 jyldan bastap Qazaqstandy baqylaý kezeńinde eldegi avıatsııalyq bılik organdarynyń jumys isteýiniń jańa modeli damýdyń jáne tıimdi qalyptasýynyń oń dınamıkasyn kórsetedi, bul da Eýropaǵa ushýǵa qandaı da bir shekteýleri joq otandyq áýe tasymaldaýshylaryn damytýǵa qolaıly jaǵdaı jasaıdy. Halyqaralyq azamattyq avıatsııa uıymy men Eýropalyq komıssııanyń baǵalaýy boıynsha, Qazaqstan azamattyq avıatsııa menedjmentin reformalaýdyń sátti úlgisi bolyp tabylady.
