Eýropalyq komıssııa Snapchat-ty balalardy qorǵaý erejelerine sáıkestigin tekseredi
ASTANA. KAZINFORM – Eýropalyq komıssııa Snapchat kompanııasyna qatysty balalardy qorǵaý erejeleriniń saqtalýyn tekserý úshin tergeý bastady. Bul týraly Kazinform agenttiginiń Brıýsseldegi menshikti tilshisi habarlady.
Snapchat — foto jáne qysqa beınelermen («snaptar») jedel almasýǵa arnalǵan mobıldi qosymsha. Ol ásirese jas qoldanýshylar arasynda tanymal, sonyń ishinde beıneoıyndar kezinde qarym-qatynas quraly retinde keń qoldanylady.
Eýropalyq komıssııa bul tergeýdi Tsıfrlyq qyzmetter týraly zań (DSA) talaptaryna sáıkes platforma balalardyń qaýipsizdigin, qupııalylyǵyn jáne ınternettegi qorǵalýyn jetkilikti deńgeıde qamtamasyz ete me, sony anyqtaý úshin bastaǵan.
Brıýsselde Snapchat kámeletke tolmaǵandardy quqyqqa qaıshy áreketterge tartý nemese qylmystyq maqsatta paıdalanýǵa jol berýi múmkin degen kúdik bar. Sondaı-aq platformada esirtki nemese jasy boıynsha shekteýli taýarlar (elektrondy temeki, alkogol) týraly aqparat taralýy múmkin ekeni aıtylyp otyr.
Tergeý bes negizgi baǵyt boıynsha júrgiziledi:
— qoldanýshylardyń naqty jasyn tekserý. Platformany paıdalaný úshin keminde 13 jas bolýy tıis, alaıda tek ózin-ózi jarııalaý jetkiliksiz bolýy múmkin;
— kámeletke tolmaǵandardy qylmysqa tartý qaýpi. Komıssııa Snapchat zııandy nıeti bar paıdalanýshylardan (mysaly, qanaý nemese qylmysqa tartý) jetkilikti qorǵamaıdy dep kúdiktenedi;
— akkaýnttardyń bastapqy baptaýlary. Ádepki parametrler balalardyń qaýipsizdigi men qupııalylyǵyn tolyq qamtamasyz etpeýi múmkin;
— tyıym salynǵan taýarlar týraly aqparattyń taralýy. Kontentti moderatsııalaý quraldary mundaı mazmundy tıimdi shektemeıdi degen kúdik bar;
— zańsyz kontent týraly habarlaý júıesi. Qoldanystaǵy mehanızmder qoldanýǵa yńǵaısyz bolýy jáne paıdalanýshylarǵa shaǵymdaný múmkindikteri týraly jetkilikti aqparat bermeýi múmkin.
Endi Eýropalyq komıssııa tergeýdi tereńdetip, qosymsha dálelder jınaıdy. Bul aqparat suratý, suhbat júrgizý jáne tekserister uıymdastyrý arqyly júzege asady.
