Eýropalyq klýb Ramazan Orazovtyń oıynyna kóńili tolmaı, kelisimshartty buzdy

Qazaqstan quramasynyń jartylaı qorǵaýshysy Ramazan Orazov slovenııalyq «Koperden» ketedi, dep habarlaıdy Kazinform agenttigi Sports.kz-ke silteme jasap. 

Jergilikti BAQ-tyń habarlaýynsha, klýb basshylyǵy fýtbolshymen kelesi maýsymnyń sońyna deıin belgilengen kelisimshartty merziminen buryn buzý jóninde sheshim qabyldaǵan.

Oǵan klýb basshylyǵynyń Orazovtyń oıynyna kóńili tolmaýy sebep.

«25 jastaǵy Orazov bıylǵy jazda „Tobyldan“ „Bonıfıka“ stadıonyna aýysyp, qazaqstandyq BAQ-tyń nazaryn „Koperge“ aýdarǵan bolatyn. Ol komanda quramynda 12 kezdesý ótkizip, nebary bir ǵana gol soqty. „Koper“ onyń kelisim-shartyna kelesi maýsymnyń sońyna deıin qol qoıylǵanymen, klýbtaǵy eń joǵary jalaqy alatyn oıynshylardyń biri ekenin eskere otyryp, qosqan úlesi jetkiliksiz dep sanaıdy. Nátıjesinde kelisimshartty merziminen buryn buzý jóninde sheshim qabyldandy», - dep jazdy FootballPlanet.

Aıta keteıik, «Koper» men «Tobyldan» bólek Ramazan Orazov 2023 jyly «Aqsý» quramynda da oınap úlgerdi.

«Qaırat» túlegi buǵan deıin shetelde — Latvııanyń «Daýgavpılsy» (2020) men Reseıdiń «Chaıkasynda» (2020-2021) qysqa merzimdi óner kórsetti.