Eýropalyq keńestiń tóraǵasy: Energetıkalyq táýelsizdik – Eýropanyń jalǵyz amaly
ASTANA. KAZINFORM — Eýropalyq keńestiń tóraǵasy Antonıý Koshta Eýropa úshin uzaq merzimdi ári turaqty sheshim — óz energetıkalyq kózderin damytý ekenin málimdedi. Onyń aıtýynsha, bul baǵytta atom energetıkasyn da, jańartylatyn energııa kózderin de qatar damytý qajet, dep jazdly Anadoly agenttigi.
Antonıý Koshta Grekııa Premer-mınıstri Kırıakos Mıtsotakıspen birge Delfı qalasynda ótken ekonomıkalyq forým aıasyndaǵy paneldik pikirtalasqa qatysty.
Taıaý Shyǵysta Izraıl men AQSh-tyń Iranǵa jasaǵan soqqylarynan keıingi jaǵdaıǵa toqtalǵan Koshta:
— Biz óte kúrdeli kezeńdi bastan ótkerip otyrmyz. Bul soǵys halyqaralyq quqyqqa úlken syn-qater týǵyzýda, — dedi.
Ol halyqaralyq quqyqtyń balamasy — beıbereketsizdik ekenin atap ótip, qazirgi daǵdarystyń jahandyq ekonomıkaǵa áseriniń biri Ormýz buǵazynyń jabylýy ekenin aıtty.
Koshtanyń sózinshe, Eýropa taraptardy shıelenisti azaıtyp, dıplomatııalyq jolmen uzaq merzimdi bitimge kelýge shaqyryp otyr. Sondaı-aq teńiz qatynasynyń erkindigin saqtaý asa mańyzdy ekeni aıtyldy.
Onyń pikirinshe, qazirgi jaǵdaı aıasynda Eýropa elderinde energııa baǵasynyń kúrt ósýi baıqalyp otyr.
— Eýropa úshin jalǵyz júıeli sheshim — óz energııasyn ózi óndirý. Bul atom energetıkasy da, jańartylatyn energııa kózderi de bolýy múmkin. Áıtpese, biz únemi táýekelderge táýeldi bolyp qala beremiz, — dedi Koshta.
Sondaı-aq ol energetıka salasyna ınvestıtsııa salý Eýropanyń strategııalyq derbestigi men táýelsizdigi úshin qajet ekenin, bul másele tikeleı qaýipsizdikke qatysty ekenin atap ótti.
Óz kezeginde Kırıakos Mıtsotakıs Taıaý Shyǵystaǵy jaǵdaıdy kúrdeli daǵdarys dep baǵalady. Onyń aıtýynsha, Ormýz buǵazynyń uzaq ýaqytqa jabylýy munaı men munaı ónimderin jetkizýge kedergi keltirip, energııa baǵasynyń ósýine, tyńaıtqysh tapshylyǵyna, ınflıatsııanyń artýyna jáne ekonomıkalyq ósimniń baıaýlaýyna ákelýi múmkin.
Grekııa Premer-mınıstri bul saldarlar barlyq Eýropa elderine áser etetinin aıtyp, basty maqsat — turaqty bitimge qol jetkizý ekenin jetkizdi.
Sonymen qatar, ol Eýropa elderi ishki energetıkalyq táýelsizdikti qamtamasyz etý úshin atom energetıkasyn damytýdy qaıta qolǵa alýy qajet degen pikir bildirdi.
Buǵan deıin EO-nyń energııa shyǵyndary 24 mlrd eýroǵa artqanyn jazdyq.
