Eýropalyq Keńes tóraǵasy «Astanalar týrnesine» barady

ASTANA.KAZINFORM - Eýropa keńesiniń tóraǵasy Antonıý Koshta qyrkúıek aıynyń alǵashqy aptalarynda «Astanalar týrnesi» dep atalatyn is-shara aıasynda Eýroodaq elderiniń birneshe astanalaryn aralaıdy, dep habarlaıdy Kazinform agenttiginiń menshikti tilshisi.

Astanalardy aralaý A.Koshtaǵa aldaǵy eýropalyq keńes pen halyqaralyq sammıtterge daıyndalý maqsatynda EO-daǵy jaǵdaıǵa qatysty memleket jáne úkimet basshylarynyń pikirimen tanysýǵa múmkindik beredi dep habarlandy.

- Aldaǵy úsh aptada men Eýropany aralap, olardyń astanalarynda EO basshylarymen kezdesemin. Bul áńgimeler aldaǵy aılardaǵy ortaq kún tártibimizdi qalyptastyrýǵa kómektesedi. Eýropalyq Keńestiń Prezıdenti retinde, ásirese osy belgisiz ýaqytta barlyq kóshbasshylardyń basymdyqtaryn tyńdaý jáne túsiný meniń mindetim. Meniń rólim konsensýs qurý. Ár saparda yntymaqtastyǵymyzdy nyǵaıtýǵa kúsh salatyn bolamyn, óıtkeni búgingi boljaýǵa bolmaıtyn dúnıede bizdiń eń úlken kúshimiz – birlik, - dedi A.Koshta.

Prezıdent A.Koshta kóshbasshylarmen kezdesýlerinde negizgi saıası basymdyqtardy, sondaı-aq Eýropalyq keńestiń jumys ádisterin talqylaıdy.

Eýropalyq keńes basshysy qyrkúıektiń 1-i men 19-y aralyǵynda kóptegen elge barady. Belgııa Premer-mınıstri Bart de Vevermen alǵashqy kezdesý 27 tamyzda Brıýsselde ótti.

Týrdyń birinshi aptasynda A.Koshta 2 qyrkúıekte Slovenııa Premer-Mınıstri Robert Golobpen kezdesedi.

2 qyrkúıekte eýropalyq kóshbasshy Zagrebte Horvatııa premer-mınıstri Andreı Plenkovıchpen de kezdesedi. 3 qyrkúıekte ol Venada Aýstrııa kantsleri Krıstıan Stokkermen kezdesedi. 4 qyrkúıekte Rýmynııada prezıdent Nıkýshor Danmen, Bolgarııada premer-mınıstr Rossen Jelıazkovpen kezdesedi.

Apta 5 qyrkúıekte Chehııada premer-mınıstr Petr Fıalamen jáne Nıderlandta premer-mınıstr Dık Shýfpen kezdesýlermen aıaqtalady.

Aıta keteıik, Eýropalyq keńes prezıdenti «Ortalyq Azııa – Eýropa Odaǵy» sammıtine joǵary baǵa berdi.