Eýropalyq keńes prezıdenti «Ortalyq Azııa – Eýropa Odaǵy» sammıtine joǵary baǵa berdi

SAMARQAND. KAZINFORM – «Ortalyq Azııa – Eýropa Odaǵy» sammıti aıasynda uıymdastyrylǵan baspasóz máslıhatynda Eýropalyq keńes prezıdenti Antonıý Koshta eki óńirdiń yntymaqtastyǵyna qatysty pikir bildirdi, dep habarlaıdy Kazinform agenttiginiń menshikti tilshisi Álıhan Asqar.

- Ortalyq Azııa men Eýropa Odaǵyn tek saýda-ekonomıkalyq yntymaqtastyq baılanystyrmaıdy. Bizdiń tarıhymyz tereń, sondaı-aq mádenı-gýmanıtarlyq salalardaǵy yqpaldastyǵymyzdyń orny erekshe, - dep málim etti Antonıý Koshta.

Ol Ortalyq Azııada jáne Eýropada turaqtylyqty saqtap, yqtımal qaterlerge qarsy turý úshin birlesken jumys qajet ekenine toqtaldy.

- Osy oraıda Samarqand sammıtin ótkizýdiń mańyzy zor. Buǵan deıin qos óńir arasyndaǵy qarym-qatynas mundaı joǵary deńgeıge jetpegen edi. Sondyqtan bul sammıt barlyq saladaǵy yntymaqtastyqqa serpin beretini sózsiz. Muny jańa qarym-qatynasqa aıaq basqan kezeń dep atasa bolady, - dep túıindedi Eýropalyq keńes prezıdenti.

Aıta keteıik, búgin Ózbekstannyń Samarqand qalasynda «Ortalyq Azııa - Eýropa Odaǵy» formatyndaǵy alǵashqy sammıti ótti. Onyń barysynda Memleket basshysy Qasym-Jomart Toqaev birqatar bastama kóterdi.