Eýropalyq Keńes Palestınany qalpyna keltirý isine qoldaý kórsetedi
ASTANA. KAZINFORM – Eýropalyq Keńes prezıdenti A.Koshta Mysyr prezıdenti Abdel Fattah as-Sısı men AQSh prezıdenti Donald Tramptyń shaqyrýymen 13 qazan kúni «Sharm-esh-Sheıhte ótetin beıbitshilik sammıtine» Eýropa odaǵynyń atynan qatysady, dep habarlaıdy Kazinform menshikti tilshisi.
AQSh, Mysyr, Qatar men Túrkııanyń araǵaıyndyǵynyń arqasynda qol jetkizilgen Taıaý Shyǵystaǵy beıbit jospardyń birinshi kezeńi boıynsha kelisim Gazada atysty turaqty toqtatyp, kepildegi adamdardy bosatyp, Gazaǵa gýmanıtarlyq kómekke tolyqqandy qol jetkizý baǵytyndaǵy maǵyzdy qadam sanalady.
Eýropalyq Keńes Palestına ákimshiligine qoldaý kórsete otyryp, erteńgi kúnniń sátti bolýy úshin ótpeli basqarýǵa, qalpyna keltirý jumystaryna úles qosqysy keledi.
Bul qadam Izraıl men Palestına kórshiles el retinde birlesip, qaýipsiz ári beıbit ómir súretin kezde tatý kórshi ustanymy negizinde uzaqmerzimdi turaqtylyqqa jol salýy qajet.
Prezıdent A.Koshtanyń Dýblınge alǵashqy sapary men dúısenbi, 13 qazanǵa josparlanǵan premer-mınıstr Maıkl Martınmen kezdesýi keshirek ótetin boldy.
Eýropalyq odaq pen oǵan múshe memleketter — álemdegi jetekshi gýmanıtarlyq donorlardyń qatarynda. Olar sonyń ishinde Palestına halqyna kómek kórsetip, adam ómirin saqtaýǵa, azapty jeńildetýge jáne adamı qadir-qasıetti saqtaýǵa baǵyttalǵan gýmanıtarlyq baǵdarlamalardy qarjylandyryp keledi.
Ótken jyldyń qyrkúıeginde Eýropalyq odaq atynan Prezıdent Antonıý Koshta BUU Bas Assambleıasy aıasynda Nıý-Iorkte ótken Palestına máselesin beıbit jolmen retteý jáne «eki memleket» qaǵıdatyn iske asyrý jónindegi joǵary deńgeıdegi halyqaralyq konferentsııaǵa qatysty. Konferentsııany Frantsııa men Saýd Arabııasy birlesip uıymdastyrǵan bolatyn.
Osyǵan deıin Gaza boıynsha beıbit kelisimge 13 qazan kúni HAMAS-tyń qatysýynsyz qol qoıylatyny týraly jazdyq.