Eýropalyq keńes Iran tóńiregindegi qaqtyǵysty tez arada báseńdetýge shaqyrdy
ASTANA. KAZINFORM — Eýropalyq keńes Iran tóńiregindegi qaqtyǵysty dereý báseńdetýge shaqyryp, onyń óńirlik jáne jahandyq qaýipsizdikke tóndiretin qaterin atap ótti. Bul týraly 19 naýryzda Brıýsselde ótken sammıt qorytyndysy boıynsha Eýroodaq basshylarynyń qorytyndy málimdemesinde aıtyldy, dep habarlaıdy Report.
Qujatta Eýroodaq basshylary Irannyń aımaq elderine jasaǵan soqqylaryn aıyptap, olardyń dereý toqtatylýyn talap etip, egemendik pen halyqaralyq quqyqty qurmetteýge shaqyrdy.
EO keńesi sondaı-aq energetıkalyq jáne sý nysandaryn qosa alǵanda, azamattyq ınfraqurylymǵa jasalatyn shabýyldarǵa moratorıı engizýdi qoldap, beıbit turǵyndar arasyndaǵy qurbandar sanynyń artýyna jáne qaqtyǵystyń ekonomıkalyq saldaryna alańdaýshylyq bildirdi.
Sondaı-aq, keme qatynasynyń erkindigin qamtamasyz etý qajettiligi, eń aldymen Ormýz buǵazy arqyly teńiz qaýipsizdigin kúsheıtý erekshe atap ótildi. EO óz mandatyn ózgertpesten, óńirdegi áskerı-teńiz mıssııalaryn nyǵaıtýdy kózdep otyr.
EO kóshbasshylary qaqtyǵys aımaǵyna jaqyn ornalasqan elderdi qoldaıtyndyqtaryn rastady. Olar áýe qorǵanysy júıeleri men ushqyshsyz ushaqtarǵa qarsy kúresti kúsheıtý qajettigin atap ótti.
Sonymen qatar, Eýropalyq Odaq shıelenisti azaıtýǵa baǵyttalǵan dıplomatııalyq kúsh-jigerge qatysýǵa daıyn ekenin málimdep, Iran ıadrolyq qarýǵa ıe bolmaýy kerek ekenin erekshe atap ótti.
Málimdemede Gaza sektory men Batys jaǵalaýdaǵy jaǵdaıǵa baılanysty alańdaýshylyq bildirilip, Izraıl men Palestınaǵa negizdelgen eki memleket sheshimin qoldaýǵa berik ustanym rastaldy. Sondaı-aq EO kóshbasshylary gýmanıtarlyq kómektiń Gaza sektoryna kedergisiz jetkizilýin qamtamasyz etýge shaqyrdy.
Eýropalyq odaq Lıvandaǵy jaǵdaıǵa baılanysty qaqtyǵysty báseńdetýdi usynyp, eldiń táýelsizdigin qoldady. «Hezbolla» áreketterin aıyptaı otyryp, BUU-nyń beıbitshilik mıssııasyn qoldaıtynyn rastady.
Eske sala keteıik, bıyl jyldyń basynda Kıpr Respýblıkasy resmı túrde Danııadan Eýropalyq keńestiń tóraǵalyq estafetasyn qabyldady.
