Eýropalyq Keńes €800 mıllıard kólemindegi qaıta qarýlaný josparyn maquldady

ASTANA.KAZINFORM — Beısenbi kúni keshke Brıýsselde Eýropalyq Odaqqa múshe 27 memleket basshylarynyń tótenshe sammıti aıaqtaldy, dep habarlaıdy Kazinform tilshisi.

Shuǵyl tujyrymdama Eýropa úshin osy kezeńdegi taǵdyrly máselelerdi talqylaýdy kózdedi — bul Ýkraınanyń qorǵanys qabiletin nyǵaıtý jáne qoldaý. Eki taqyryp ta Brıýssel úshin AQSh-tyń jańa basshylyǵynyń Kıevke áskerı kómek kórsetýdi jáne Ýkraınamen barlaý almasýdy toqtatý týraly sheshimderinen keıin ózekti bola tústi.

Talqylaý nátıjesinde EO basshylary qorǵanys qabiletin nyǵaıtý jáne Ýkraınany odan ári qoldaý boıynsha birlesken kommıýnıke shyǵardy. Alaıda, Vengrııa sońǵy qujatqa qol qoıýdan bas tartty, onyń premer-mınıstri Vıktor Orban EO-nyń jalpy ustanymyna kelispeıtindigin bildirdi.

— Amerıkalyqtar Ýkraınany qoldaýdy toqtatty. Eýropalyqtardyń edáýir bóligi amerıkalyqtardyń ornyn basqysy keledi. Kelisim joq. Pikirtalas jalǵasady, — dep jazdy V. Orban Facebook áleýmettik jelisinde.

Barlyq kóshbasshy osy aptanyń basynda Eýropalyq komıssııanyń basshysy Ýrsýla fon der Lıaıen usynǵan jáne kontınentti qaıta qarýlandyrýǵa baǵyttalǵan bes tarmaqty bastama týraly bloktyń ujymdyq qorǵanysyn nyǵaıtý týraly málimdemeler jasady.

Eýrokomıssııa basshysynyń bastamasy «ReArm Europe» («Eýropany qaıta qarýlandyrý») dep atalady. Jospar 800 mıllıard eýro bólýdi, onyń ishinde EO elderiniń áskerı áleýetin nyǵaıtý úshin 150 mıllıard eýro nesıe tartýdy kózdeıdi. Negizgi aspekt EO-ǵa múshe elder EO-nyń bıýdjettik tártip normalaryn buzǵany úshin Eýrokomıssııa tarapynan aıyppul salynbaı, qorǵanysqa qosymsha shyǵyndardy óz moınyna alýy úshin fıskaldyq erejelerdi jeńildetý bolýy tıis.

Eýroodaq sondaı-aq «qaryzdyń turaqtylyǵyn qamtamasyz ete otyryp, barlyq múshe memleketterde ulttyq deńgeıde qorǵanysqa jumsalatyn shyǵyndardy edáýir arttyrýǵa yqpal etý úshin» jańa qorlardy buǵattan shyǵarýdy tapsyrdy.

Sonymen qatar, EO kóshbasshylary Eýropalyq komıssııaǵa «barlyq múshe memleketterge usynylatyn qosymsha múmkindikter men yntalandyrýlardy qosa alǵanda, EO deńgeıinde qorǵanysty qarjylandyrýdyń qosymsha kózderin usynýdy» tapsyrdy.

Sammıtke Ýkraına prezıdenti Vladımır Zelenskıı qatysty, ol Frantsııa, Italııa jáne Belgııa basshylarymen jeke kezdesý ótkizdi.

Aıta ketelik Brıýsselde Eýropalyq Odaqtyń shuǵyl sammıti jumysyn bastaıtynyn jazǵan edik.