Eýropalyq ǵarysh agenttigi alǵash ret qorǵanys jobalaryna nazar aýdarmaq

ASTANA. KAZINFORM – Eýropalyq ǵarysh agenttigi (ESA) múshe memleketterden aldaǵy úsh jylda 22 mlrd eýro qarjylandyrý surady. Bul aldyńǵy bıýdjetpen salystyrǵanda 36% kóp, dep habarlaıdy DW aqparat agenttigi. 

26 qarasha kúni Germanııanyń Bremen qalasynda ESA-ǵa múshe 23 memlekettiń ǵarysh mınıstrleriniń eki kúndik kezdesýi bastaldy. Onda Eýropanyń ǵaryshta áskerı qatysýyn nyǵaıtýǵa arnalǵan 1,35 mlrd eýrolyq baǵdarlama usynylady. Bul 1975 jyly azamattyq uıym retinde qurylǵan bul agenttiktiń qorǵanys jobalaryna alǵashqy qadamy bolmaq.

ESA bas dırektory Iozef Ashbaher uıymǵa múshe memleketterge ózderiniń ǵaryshtyq aktıvterin bólisýge múmkindik beretin «Ǵaryshtan eýropalyq tózimdilik» baǵdarlamasyn usyndy. Ashbaherdiń pikirinshe, ǵaryshtyq baǵdarlamalardy qarjylandyrý endi qorǵanys mınıstrlikteri júzege asyratyn bolady, Eýropada bul negizinen azamattyq mınıstrlikterdiń mindeti bolǵan.

«Ǵaryshtan eýropalyq tózimdilik» baǵdarlamasy Ilon Masktyń Starlink spýtnıktik baılanys jelisine eýropalyq balama Iris2 jáne amerıkalyq GPS-tiń analogy bolǵan eýropalyq Galileo navıgatsııalyq júıesi sııaqty jobalardy paıdalanady. Maqsatty paıdalanýshylar áskerı kúshter, polıtsııa jáne azamattyq qorǵanys qyzmetteri bolady. Usynys Bremendegi ESA mınıstrler keńesinde Germanııa, Frantsııa, Ulybrıtanııa jáne basqa da elderdiń ǵarysh agenttikteriniń basshylarymen daýysqa salynady.

– Ashbaher iri elderdi ózderiniń egemendi ǵarysh aktıvterin bólisýge kóndirý qıyn bolatynyn moıyndady. Alaıda «Eýropa úshin bizdiń táýelsizdigimiz ben avtonomııamyzdy nyǵaıtý shynymen mańyzdy, - dep atap ótti ol.

Buǵan deıin Eýroodaq qorǵanys tehnologııalaryn damytýǵa 1 mlrd eýrodan asa qarjy bóletinin jazǵan bolatynbyz.