Eýropalyq ǵarysh agenttigi Alakóldiń biregeı sýretin jarııalady
Bul 3 radıolokatsııalyq túsirilimdi biriktiredi jáne 2025 jylǵy kóktem mezgilindegi sý aıdyny men landshafttaǵy maýsymdyq ózgeristerdi baqylaýǵa múmkindik beredi. ESA naýryz, sáýir jáne mamyr aılarynda túsirilgen úsh bólek radarlyq sýretti biriktirdi. Túsirilim Copernicus Sentinel-1 spýtnıgi arqyly júrgizilgen. Ár sýretke jeke tús berilgen.
Alakól ataýy «ala kól» degendi bildiredi. Sýrette ony túsirilim kezindegi kól betindegi muz qabatynyń ózgerýine baılanysty kók jáne jasyl tústiń ártúrli reńkterinde kórýge bolady. Bul tuzdy kól qysta shamamen eki aı boıy muzben jabylyp, erte kóktemde ashylatyndyqtan, kógildir bolyp kórinedi. Sebebi naýryz aıyndaǵy túsirilim kezinde onyń beti negizinen qatyp turǵan, — dep atap ótedi ESA.
Sýrette Alakóldiń soltústik-batysynda ornalasqan kórshiles Koshkarkól jáne Sasykkól kólderi de kórsetilgen. Olardyń aınalasy sary, qyzǵylt jáne kúlgin tústerge boıalyp, kóktem kezindegi ósimdikterdiń ózgerýin kórsetedi. ESA Alakól–Sasykkól kólder júıesi Ramsar konventsııasy boıynsha halyqaralyq mańyzdy sýly-batpaqty alqap ekendigine jáne ıÝNESKO bıosferalyq rezervattar tizimine engenine nazar aýdarady. Olar dalmatın pelıkany men úlken qoqıqaz tárizdi ártúrli qustardyń mańyzdy kóshi-qon baǵyty jáne uıa salatyn orny.
Alakól alǵash ret ózine nazar aýdartyp otyrǵan joq. Bul kól — burynnan beri óziniń mıneraldy jáne emdik qasıetterimen tanymal. Keńestik kezeńde ǵaryshkerler Jerge oralǵan soń, aǵzany qalpyna keltirý jáne ǵaryshtyq radıatsııadan tazartý maqsatynda Alakólge jiberilgen. Búginde onyń shıpaly sýy men quramy erekshe balshyǵy týrısterdiń qyzyǵýshylyǵyn oıatady.
Aıta keteıik, 2022 jyldan beri Kazakh Tourism «Kids Go Free» baǵdarlamasyn júzege asyryp keledi jáne onyń aıasynda Alakól kóli ekinshi jyl qatarynan eń suranysqa ıe destınatsııaǵa aınalyp otyr.
2024 jyly 700 astam bala bul baǵyt boıynsha tegin áýe bıletterin ıelense, týroperatorlar 330-dan astam týrdy satty.
Buǵan deıin habarlanǵandaı, Alakól jaǵalaýynda 2018 jyldan beri jóndeý jumystary júrgizilmegen.