Eýropalyq dıplomattardyń Iran SІM basshysymen kezdesýi nátıje bermedi
ASTANA. KAZINFORM — Bul ótken juma kúni Izraıldiń Iranǵa qarsy áskerı áreketter bastaǵan sátinen bergi batystyq jáne ırandyq resmı tulǵalardyń alǵashqy jeke kezdesýi boldy, dep habarlaıdy Kazinform agenttiginiń menshikti tilshisi.
Eýropanyń jetekshi dıplomattarynyń Iran SІM basshysymen 20 maýsymdaǵy kezdesýi úmit uıalatqanymen, naqty nátıje bermedi
Ulybrıtanııa, Frantsııa jáne Germanııanyń syrtqy ister mınıstrleri, sondaı-aq Eýroodaqtyń syrtqy saıasat jónindegi basshysy Kaıa Kallas Jenevadaǵy qonaqúıde Irannyń Syrtqy ister mınıstri Abbas Arakchıdiń kezdesýge kelgeninen keıin shamamen tórt saǵattan soń kelissóz zalynan shyqty.
Kelissózder aıaqtalǵannan keıin jarııalanǵan birlesken jazbasha málimdemede úsh eýropalyq memleket pen Eýroodaq Irannyń ıadrolyq baǵdarlamasyna qatysty kelissózder arqyly sheshim tabý joldaryn talqylaǵandaryn málimdedi.
Eýropalyq tarap Irannyń ıadrolyq baǵdarlamasynyń «keńeıip» jatqandyǵyna taǵy da alańdaýshylyq bildirip, bul baǵdarlamanyń «azamattyq maqsatqa baǵyttalǵandyǵy dáleldenbegen» dep qosty.
EO-nyń syrtqy saıasat jónindegi basshysy Kaıa Kallas bylaı dedi:
— Biz ıadrolyq máseleni, sondaı-aq bizde bar keń aýqymdy máselelerdi talqylaýǵa kelistik jáne pikirtalasty ashyq kúıde qaldyrdyq.
Germanııanyń Syrtqy ister mınıstri taraptar «óte baısaldy kelissózder» júrgizgenin atap ótti.
— Búgingi kezdesýdiń jaqsy nátıjesi ırandyq taraptyń mańyzdy máseleler boıynsha talqylaýdy jalǵastyrýǵa daıyn ekendigi týraly ásermen ketip bara jatqanymyz, — dedi Germanııanyń Syrtqy ister mınıstri Iohan Vadefýl.
Frantsııanyń Syrtqy ister mınıstri Jan-Noel Barro jýrnalısterge: áskerı operatsııalar Irannyń ıadrolyq baǵdarlamasyn baıaýlatýy múmkin, biraq ony tolyqtaı joıý múmkin emes ekenin aıtty.
— Biz Aýǵanstan, Irak jáne Lıvııadaǵy jaǵdaıdan keıin syrttan rejım aýystyrýǵa umtylý — bul eleske sený jáne óte qaýipti áreket ekenin jaqsy bilemiz, — dedi ol.
Barro sonymen qatar eýropalyq elder ırandyq mınıstrge «soqqylardyń aıaqtalýyn kútpeı-aq» AQSh qosa alǵanda barlyq tarappen kelissóz júrgizý múmkindigin qarastyrýdy usynǵanyn aıtty.
Alaıda barlyq ýádelerge qaramastan, Iran ıadrolyq baǵdarlama boıynsha jańa kelissózder júrgizý múmkindigin Izraıldiń shabýyldary toqtamaıynsha joqqa shyǵardy.
Arakchıdiń aıtýynsha, Iran tek «Izraıl agressııasy toqtaǵan» jaǵdaıda ǵana dıplomatııany qarastyrýǵa daıyn.
— Men anyq aıtamyn, Irannyń qorǵanys áleýeti talqylaýǵa jatpaıdy, — dep atap ótti Iran SІM basshysy Jenevadaǵy kelissózderden keıin.
Ol EO men «Úshtik Eýropa» elderimen (E3) pikir almasýdy jalǵastyrýǵa qoldaý bildirip, jaqyn arada taǵy da kezdesýge daıyn ekenin aıtty. Sonymen birge Izraıldiń Irandaǵy ıadrolyq nysandarǵa jasaǵan shabýyldaryn aıyptap, eýropalyq elderdiń bul áreketterdi aıyptamaýyna «qatty alańdaýshylyq» bildirdi.
Óz kezeginde Ulybrıtanııanyń Syrtqy ister mınıstri Devıd Lemmı Tegerandy AQSh-pen kelissózdi jalǵastyrýǵa shaqyrdy.
— Biz Iranmen qazirgi pikir almasýlar men kelissózderdi jalǵastyrýǵa nıettimiz jáne Irandy AQSh-pen kelissózdi jalǵastyrýǵa shaqyramyz. Iranda ıadrolyq qarý bolmaýy tıis ekenin naqty aıttyq, — dep qosty Lemmı.
Ol sondaı-aq «aldaǵy eki apta ishinde dıplomatııalyq sheshimge kelýge múmkindik bar» ekenin aıtyp, Irandy «osy ustanymnan bas tartýǵa» shaqyrdy.