Eýropalyq dıplomatııa basshysy EO men AQSh qarym-qatynasy jaıly pikir bildirdi

ASTANA. KAZINFORM — Eýropa astanasynda Eýropalyq odaq pen AQSh arasyndaǵy transatlantıkalyq qatynastardy talqylaýǵa arnalǵan «Brıýssel forýmy» ótip jatyr, dep habarlaıdy Kazinform tilshisi.

German Marshall qorynyń saraptamalyq alańynda sóılegen sózinde EO-nyń syrtqy ister jáne qaýipsizdik saıasaty jónindegi Joǵarǵy ókili Kaıa Kallas Eýropalyq odaqtyń AQSh-pen transatlantıkalyq baılanystarǵa adal ekenin, biraq bul Odaqtyń jańa jahandyq seriktestikter qalyptastyrýyna kedergi bolmaýy tıis ekenin atap ótti.

Onyń aıtýynsha, Eýroodaq Vashıngtonmen aradaǵy qatynastardy joǵary baǵalaıdy, alaıda Eýropa óz jahandyq áriptestikterin ártaraptandyrý úshin týyndap jatqan múmkindikterdi paıdalanýy qajet.

— Biz amerıkalyqtarmen qalyptasqan qarym-qatynasty áli de baǵalaımyz. Biraq bul bizge basqa baılanystardy ornatýǵa kedergi bolmaýy kerek, — dedi Kallas.

EO ókili Eýropanyń kóptegen el úshin senimdi seriktes ekenin jáne bul jaǵdaı EO-ǵa geosaıası ustanymyn nyǵaıtýǵa «erekshe múmkindik» beretinin aıtty.

Kaıa Kallas Eýropanyń AQSh-tan alystap bara jatqany týraly pikirdi joqqa shyǵaryp, ekijaqty qatynastardyń ózgerýin «jetilý belgisi» dep atady.

— Biz amerıkalyqtarmen alystap jatqan joqpyz, kerisinshe, qarym-qatynasymyz damyp jatyr. Bizdiń basqa da dostarymyz bar, — dedi ol.

Buǵan deıin Kaıa Kallas Silk Way telearnasyna bergen suhbatynda Eýropalyq odaq Qazaqstandy Ortalyq Azııadaǵy mańyzdy áriptes retinde qarastyratynyn jáne energetıka, saýda, ekologııalyq turaqtylyq pen bilim berý sııaqty mańyzdy salalarda yntymaqtastyqty keńeıtýge daıyn ekenin málimdegen.